Tulli ette Michel Andrei ja kaiwas. et Jaan Metshärg ollewat temmä naist lönu, temma lännü omma naisega ellajid Jaan Uibukanu maa päält ajama, ja naine lännü koddo pole, sis lännu Jaan Metshärg takkast järgi ja lönü kats kõrd russikuka kukruhe ja üts kõrd nujaka sälgä, ja and tunnistajis Jani naise emmä Ann Andrei, ja Jani naine Mai Metshärg, ja Johani naine Ann Huwwätä. -

Jaan Metshärg wastutas: minnol olli naine karjan, ja minnol olli kotton lats hoita, es sa ennämb tarrestki wäljä kui elläjä tulli metsast wäljä, sis minno naise emmä ai neid elläjid nurme päält metsa ja lätsi tole appi ellajid ajama, sis kuli et Michel omma naise ka larmitsi ent neide liggi ki es sa minna, ja kätki ei olle kulge sanu. -

Ann Andrei tunnistas: minna latsi ellajid nurme päält metsa ajama, sis kulsi mes Michel Andrei omma naisega larmitsi, sis tulli weel Michel naine mulle takkan tahtse lüwwä ja minna pässi omma kotta sis näüt mulle weel omma perst, ja toll päiwälki es näe Jaani Michel naise liggiki käüwät

Mai Metshärg tunnistas: Jaani es näegi ennamb tarrest waljänki käüwät kui ellajid wõt nurme weren minno emmä ka wasta ja känd metsa sisse kui jo karjaka koddo tulli, sis olli jo Michtel omma naiseka larmitse minneki otsan, ent lomisest ei olle ma sukkuki nannu. -

Ann Hüwwätä tunnista: minna essi ei tijä middägi, ent minno lats üttel enne et temmä om nännu kui Wenne Jaan nurme päält ellajid om ajanu, ja muud midagi ja tõrrelemisse heli om ka kulnu, ent kes omma tõrrelnu ei ütle se lats ka teedwät. -

Ja wöölmöldre Peter Zopp kes ülle om lömist kaenu ütles et muud es näe kui säljä pääl olli ni arwa 4. tolli pik werren kottus, kas ta olli lödu wai ei, ent kui ta olles lööd olnu sis olles jo nui pikkembält woinu kundutä, ja sis kutsi ne karjuse kes sääl olli kiik kokko ja nõuse perrä, ent keagi ei olle nännü Jani Michel naise liggiki käüwät. -

Moistet: Selleperräst et maneski tunnistust ei olle, et Jaan Metshärg olles Michel naise liggiki sanu sis ei woi 

                koggokonna kohhus middagi moista. -