Moisawallitsus, Th. Kussmanoff kaibas omma kolonitsa Jürri Schwalbe ülle:

1) et temme olla 16 kõiwo puud moisa mõtsast warrastanu 4-6 tolli tuwwest jämme, ja nõudis selle eest leppimissega 50 Kop. kannu päält = 8 rubl

2) olla ta õlgi müinu, ja heina ma teggemada jätnu, ja

3) olla ta hukka lasknu minna 1 kaew ja 8 wakka rukki assemel omma kontrakti perra olla temmal nüüd ennege 2 w. rukki mahha tehtu. Kontrakti perra piddanu ta igga aasta 2 w. maad mõtsmaad nurmest teggema, sedda ta ei olla teinud. Kontrakti aiga olla, temmal ennege kigest weel 3 aastat. Pälegi piddada ta wargusse pääl omma aiga ärrä wiitma, ni et temmal aiga ei olle maad arrida.

Ta, kaebaja, nõudis et Jürri Schwalbe selle kohha rikkumisse eest tullewa Jürripäiw lahti moistetud saas.

Kaewataw Jürri Schwalbe wabbandas 1, et mõtsawaht Johan Wiksi olla temmale pirru pu tarbis neid puid raggoda lubbanu, wimati kui mõtsawaht Johan Wiksi ei üttelnu õige olla, tunnistas ta wälja, et ta ei olla kül moisa käest lubba küssinu, ta olnu rummal;

2) et ta olla kül 12 wakka alla heina ärrä teinud, ennege 7 wakka ma jänu teggemada. Õlgi olla ta ennege üts käppa täis re päle pandnu nink külla läinud, müinu ta ei olla;

3) et temmal olles kül tinnawo 8 wakka rukki maan olnu, ent paljo wihma perrast olnu ma wessine, selleperrast ta ennege 5 wakka mahha teinud. Se hukka läinud kaew lubbab ta ärrä parrandada.

Tunnistaja Peter Nilus, kelle naine moisale ülles andnu, et Jürri Schwalbe õlgi müinu, ütles küssimisse päle, et ta õlle müimissest middagi kül ei teda, temma naine ennege arwanu, et Jürri Schwalbe sedda wois teinud olla, kunna ta ösel ütskörd kottust ärrä läinud.

Moisteti: 1) Et kaewatawa Jürri Schwalbe selle 16 warrastud kõiwo pu eest moisale a' 50 C. = 8 rubla massa on, ja se kaew warsti ärrä parrandada,

2) Et Jürri Schwalbe jo minnewa aasta 2 koorma heina müimisse pääl kinni woetu, ja ta omma tunnistusse perra tinnawo 7 w. ma teggemada jätnu, ja 3 w. ma rukki wähhamb mahha külwnu, kellest nähha et se hukkaminnek selle kohhale sünnib, on temmal Jürripäiwal se koht moisale käest ärrä anda. Päle se saab temma warrandus temma wõlla tassomisse kinnitusses kohto kelo alla pantus, nimmelt 2 lehma, 1 hobbene, 2 lammast, 1 reggi, 1 adder. /:Temma wõlg on moisale 8 rubla, Maggasihe: 9 zetwk. rukki:/

Se otsus sai (temmale) kohto käujile kulutedus ja kaewatawale suremba kohto käimisse tarbis õppusse kirri wälja antud.

Pä kohtomees Johan Werrew XXX

Kohtomees Jürri Konnimus XXX

Kohtomees Jaan Reinold XXX 

Thal <allkiri>, kirjotaja.