Isak Wallner kaibas siin koggokonna kohto een nidate: "Minno welli Kasper Wallner ei anna mitte minno ossajaggo kik kätte mis meije essast perra jänu warrandus om olnu, nink ka 4 wakka keswi ja 75 Kopkat rahha, mes minna Kasperile olle lainanu; ja 13 aasta pärahha 39 Rubla kui minna wenne-ussuliste koolmeister olli, sis es massa Kasper minnole ei ka koggokonnale ütteki kopkat; nink 34 aasta palk minno ja minno naisele, meije olleme temma majan tööd tennu, üts rauduka sittawiggel ja üts ilma rawwata sittawiggel nink kolm künni rauda."

Isak Wallner andse omma essa warrandusse ülles, mes 16 aasta taggan olli, kui neide welli Karl Leese tallo perremehhes läts -- nida paljo kui siin allan om ülles kirjutedu:

1 hobbene

4 lehma

3 noort tõbrast

4 zikka

3 puu wankri

3 attra

2 kattald

5 wakka kartohwlid

Leiwa terri, ei ka muud wilja es olle sel kõrral Lillu tallon middake. Kasper Wallner olli jo sel kõrral perremees nink olli mõisan küllakubjas. 

Kasper Wallner astus kohto ette nink temmale om se Isak Wallneri kaibus ette loetu; selle päle kostis Kasper Wallner: "Sedda meije essa warrandust es olle mitte nida paljo kui Isak om ülles andnu, minno teedmisse perra olli se essa warrandus paljo wähhemb kui selle maja päle wõlg olli.

Essa warrandust olli ennegi nida paljo kui siin allan om ülles kirjotedu:

1 hobbene

3 lehma, neidest om welli Karl 1 lehma sanu.

2 noort tõbrast

2 zigga

1 puu wankri

1 adder

1 kattal

5 wakka kartohwlid

4 wakka keswi mes Isak minno käest nõuwab, olle minna kül Isaku käest lainanu, nink minna olle ka Isakule tol sammal süggisel taggasi ärrä masnu.

1malt. 13 aasta pärahha, mes Isak minno käest nõuwab kui temma wenne-ussuliste koolmeister olli: Selle 13 aasta koolmeistre täwwelikku wilja palka om Isak essi egga aasta maggasi aidast wälja wõtnu nink hendale piddanu;

2selt. olli Isak minno man koddapolinne nink om minno käest täwwelikku koddapolitse palka walla pruki perra 1 wakka alla röa maad, 1 wakka alla tõuwo maad, 1 wakka alla sitta maad ja ka kartohwli nink kapsta aijamaad sanu; selle eest piddi Isak minno teenima suwwel kige naisega egga päiwa minno põllu nink maja töö teggema, talwel piddi Isak ka minno maja tööd teggema, ent Isak om egga talwe wenne ussuliste latsi kolitanu, selle perrast es sa Isak kunnagi talwel minno maja töö manno.

3malt. Isak Wallner nõuwab 34 aasta teenistusse palka hendale ja omma naisele minno käest: sedda minna ei tija, kas Isak omma essa käest om palka sanu ehk mitte; ent sellest ajast sani kui minna Lillu maja perremehhes sai, om Isak egga aasta minno käest täwwelikku koddapolitse palka sanu walla pruki perra. 

Minna palle koggokonna kohhut minno nink Isaku kohto käimissele ütte selletust tetta, et meije kohto käuminne ütskõrd otsa saas."

Kewwadel 1871 om Lillu tallon wallawannemb Johann Zimmer, wöörmünder Isak Wallner ja kohtomees Ado Puusep -- Isak ja Kasper Wallneri essast perra jänu warrandusse ülle selletust tennu, nink Isak, kui ka Kasper Wallner omma mõllemba selle selletussega rahhule jänu. Kasper om Isakule weel andnu: "1te lehma, 1te wassika 1 aasta wanna, 1 wak keswi, 1/3 wak ubbe, 2 zikka 1 aasta wannu ja 6 wakka kartohwlid, sedda tunnistab Isak Wallner kik minnewal kewwadel kätte ollewat sanu.

Otsus.

Isak Wallner om omma ossajaggo minnewal kewwadel welle Kasper Wallneri käest kik kätte sanu nink om sis sellega koggoni rahhule jänu -- selle perra ei olle ennamb Isak Wallneril nüüd üttegi essast perra jänu warrandusse nõudmist Kasper Wallneri käest.

Kasper Wallner lubbas siin koggokonna kohto een weel Isak Wallnerile 3 wakka keswi, 4 wakka kartohwlid ja 75 Kopkat rahha anda, ütsinda selleperrast, et selle tülli nink kohton käumissel üts kõrd saab ots sama. 

Isak Wallnerile om ka se sädusse perra Appellation täht wälja antu sel 17. Mail 1872. 

Päkohtomees Märt Lüüs XXX

Kohtomees Jaan Reiljan XXX

  "  Sahkri Pik XXX

  "  Ado Puusep XXX

  "  Karl Wallner XXX