Kohto ette tulli kaibusega soldat Johann Peterson, kui tema om 2 ehk 3 nädalid tagasi pühäpa õdangul Ilmjerwe kõrdsin olnu, sis on Ilmjerwe kõrdsimees Michalaÿ Kartusow teda Kiisla Johanis sõimanu, - pälle selle ollew tema - soldat Johann Peeterson - kõrdsimehele wasta üttelnu: "Kui mina ole Kiisla Johan, - kes teed mis sugune Petseri Müüri pasandaja sina sis olet;" - selle pääle olla sis kõrdsimee teda pesma nakkanu, maha löönu, nink üle kõrdsi- ja Wööruse läwe jalguga wälja pesnu ja kukkutanu, kos tema paljo haiged om saanu, nink käe ja sälja katski löönu; tunnistajad olla: Wana Michel Maala, Kikka Hindrik Weski ja Michel Kep. - Ta nõwwap kõrdsimehe käest 60 Rubla, nink palles et kogokonna kohus seda asja wõttas seletada, ja et kogokonna kohus kõrdsimehele moistassi - temale 60 Rubla massa. -

Wõeti tunnistajid kullelda:

Tunnistajad: Wana Michel Maala, ja Kikka Hindrik Weski es olewa täämba tullnu. -

Michel Kep tunnistas: Soldat Johann Peeterson om kellegaki pliidi pääl kõnelnu ja kõrdsimees olla soldatile üttelnu: "Kiisla mine jo kodo;" sis olla soldat J. Peterson wasta üttelnu: "Kui mina Kiisla ole, sis olet sina wist mõni Petseri müüri pasandaja. Sis om kõrdsimees soldati Joh. Peetersoni maha löönu ja jalgaga kõrdsist wälja pesnu. - Pääle selle om Johann Peterson sisse tagasi tulnu, särgi säljast ära ajanu, nink tahtnu näüdate, et tema sälg olewad katski löödu; sis om kõrdsimees teda tõistkõrd maha löönu ja wälja wiskanu; -

Johann Peterson ei ole enamb sis sisse tulnu. - Enamb tema ei teedwad. -

Kõrdsimees Michalaÿ Kartusow kutsuti ette ja ta koste küsimisse pääle, see ollu jo arwata poole öö aiga, kui soldat Johann Peeterson nakkanu teda Petseri müüri pasandajas sõimama ja ei ole kõrdsist wälja lännu kodo minema, - sis olla tema kül Joh. Petersoni kõrdsist wälja wiskanu, - aga mitte maha löönu, ei ka tema sälga katski löönu; - see olla tühi wõls. -

Kui peas Johann Petersoni sälg katski olema, sis olla ta esi toda päiwa wasta tördud sadaden katski löönu, - seda woiwat tunnistada Märt Siiman ja Willem Peterson. -

Kutsuti ette Märt Siiman, - nink ta andse järel saiswad Protokolli. - Soldat Johan Petersoni weli Peter Peterson - om tahtnu temaga - Märt Siimaniga - purjo pääga tülli minnä, - sis om Johann Peterson wahele tulnu Peeter Peetersoni keelma, nink om sis Johan Peeterson enne ja Peeter Peeterson temale pääle - mõlemba säläli tõrdut wasta maha sadanuwa. -

Willem Peterson tunnistas niisama. -

Et soldat Johann Peeterson ja kõrdsimees Michalaÿ Kartusow tõine tõist omma sõimanuwa, nii kui tunnistaja Michel Kepp tunnistas, - sis saÿ kogokonna kohto poolt mõistetus:

Sõimamise perast peawa nema mõlemba rahu jääma, et na ommawa wastastiko tõine tõist sõimanuwa. Et Johann Peterson sälüli tördut wasta esi om kukkunu nink woip olla - sääl aiget saanu, nii kui Märt Siimann ja Willem Peeterson tunnistawa, - sis ei woÿ Johan Peeterson tolle perast midagi kõrdsimehe käest nõuda, - aga et kõrdsimees - nii kui ta esi ütles - kässika om külge lännu ja Johann Petersoni kõrdsist wälja wiskanu - peap kõrdsimees selle eest 1 Rubla trahwi kogokonna laadikude masma. -

Kohto otsus kuulutedi 1860 aastase sääduse raamatu §§ 772 ja & 773 oppusega kohto käüjile - ja Johann Peetersonile täht wälja antus, suurembat kohut käwwa. -