Nustakult sep Hans Jürjenson astus ette ja andse järel saiswad kohto asja üles. -

Tema om ostnu Ilmjerwest Tõudsi talost üts sepikoda ja 1 laut, nink om andnu raha eest wedada, - aga wedamise aigo om säält hoonete mant paljo kraami ära warastedu, - tema om seda asja kuulda saanu, wõtnu sis Ilmjerwe kohto meest Aado Peterson - ja lännuwa Tõudsile otsma. -

Edimasel päiwal om Wedaja Jaan Jürjenson sääl Tõudsil otsnu, nink om löidnu: 8 roowi aija päält, 4 roowi lauda takan, ja 3 roowi aida alt, - aida ala ollu ka pool lae palki ja 10 sawikiwwi wiidu. Taren omma nema läüdnuwa usse takkan katski raotuisi roowi witsu, nink ahjo päält 5 ära murto nukke - saina palke küllest. - Roowi witsa olluwa weel kiik Tõudsil - Nustakule ei ole noist midagi weel wiidu ollu, Kriska raud - mes ka om ära warastet - tood ei ole löitu. - Tõisel päiwal - kui kohto mees ja Hans Jürjenson - nink ka Jaan Jürjenson weel sääl otsman olliwa käänu - sis omma Roowi witsa tarest nukkast jo pea kiik ära palotedo ollu, - ahjo pääl olli ka 1 nuk mant ära palotet; - Taren om muido äl weel löütu, lahki lahotu katuse laudo. - Roowikist om kül - ni kui Jaan Jürjenson edimätse päiwa om otsnu - 15 tükki kätte saadu - aga sep Hans Jürjenson arwas - et weel ka mitte kiik roowiku ei ole kätte saadu - sest ära olla warastet - kiik lauda kattusse tõise külle roowiku - ja olewad ennegi sinne 3 tüki järele ollu jäetu. - Kriska rauda ka ei ole löitu - mes ka olli warastet. -

Et sep Hans Jürjenson oma kraami kiike ei ole kätte saanu - sis arwas ta oma kahjo suures; - üte külle katuse roowikist 15 tüki käte saadu - nink Tõudsi peremees Jaan Saar olla ka kül omalt poolt 10 roowikud manu andnu - noideka woiwat weel mitte üte lauda külje kattust üles katta.

Saina palgest omma paljo nukke ära murto ja palotedu - mes mitte enamb ei woidawat ega palki oma aseme pääle sünnütada, - katusse laudo ei olewat kiiki kätte sanu, - nink - et tema to hoone weel ei ole Nustakul üles säädnu - ei wopida ta ette teeda - ehk wahest tema kramist pool woida ära kadunu olla, - selle et tema arwamise perra kiik to wedamise aig woida no talo rahwas tema kraami - mes ta om ostnu - palotada, - nink nõwwap selle perast 25 Rubla kahjo tasumist. -

Kutsoti ette to Tõudsi talo sulane Kusta Saar, ja ta ütles, et tema olla kül 2 roowikud katski ragonu, ja lauta üte sulo tennu - muud ei olla tema midagi wõtnu. Roowiku murdonu nuka ja roowi witsa olewad latsed toonuwa palotada - kriskast tema ka ei teadwat: - sawi kiwwe aida ala - olla karja poiskesed wiinuwa, suwes karja man ahjo tetta. - Selle pääle ütles sep Hans Jürjenson - Taren om löütu üts saega lõigatu lat katskli murto - keda tema esi katuse päält olla terwelt maha wõtnu; - et to lat om murto katski, ei mitte raoto - sis arwas sep Hans Jürjenson - et latse (karja poisi:) ei ka naisterahwas ei ole oma jõuga tood kõwwa latti katski murda jõudnu, - to om arwata meeste rahwa tego, et Kusta Saar ei ütle tost midagi teedwat - arwas sep Hans Jürjenson - et to wõls om. - kui kiik kottusse ussaijan warastedu kraami - roowikit - täüs omma - siis ei woida ommeti meeste rahwas - tost teedmada olla. -

Tõudsi peremees Jaan Saar ette kutsutu - ütles tema ei teedwat tost asjast - ei ka kraamist mes om warastedo ja tema ussaija pääle ja tarre toodu - mitte midagi, sest tema ei ollew tol ajal mitte kotun ollu. - Ilma tema teedmata ollew kül latsed ja naiset säält toonuwa prükki palotada, ja poiskese wõtnuwa sawi kiwi - hendale suwel ahjo tetta. - Ta om sis henda poolt weel 10 roowikut manu andnu - ja nema olewad ka to peenike kraam kiik kätte saanu - muud kui popsi poig olla mõne kuijonu latti witso paa all ära palotanu, - muud tema ei teedwat. -

Et no kuijonu ja katski raotu lati witsa enamb ehitus material es ole, nink ka niisammote no ära murdonu nukka - mes hoone wedaja maha lahkmise man omma ära murdnuwa, - et sep Hans Jürjenson enamb jago tood peenikest kraami om kätte saanu, ja ka et Peremees Jaan Saar weel kümme rowikut henda poolt manu olli andnu, siis ei woi sep Hans Jürjensoni kahjo mitte nii suur olla kui ta arwas, ja kogokonna kohus 

moistis:

Tõudsi peremees Jaan Saar peap sep Hans Jürjensonile 3 Rubla kahjo tasumist nädali sisen ära masma. -

Kohto otsus kuulutedi kohtun käüjile Liwlandi Talorahwa 1860 aastase sääduse raamatu §§ 772 et 773 oppusega - ja sep Hans Jürjensonile täht wälja antus suurembat kohut käwwa.