Keiserliko Tarto II jaoskonna kroonomõtsa herra G. Leucafeldt kaibusen, et peremehed Aadam ja Hindrik Uibo talwel 1876, kroono mõtsast 9 kõiwo omma warastanu - kutsuti ette mõtsawaht Jaan Juust, ja ütles, et minewa talwel om Ilmjerwe kroono mõtsast 9 kõiwo ära warastedu. Tema olla sis kohtomehe Hindrik Leiteri kutsnu ja otsma lännuwa nink omma sis Aadam ja Hindrik Uibo muro /:ussaija:/ päält no kõiwod löidnuwa tüwwiga, muud kui üte suure kõiwol ei olla tüwwe enamb ollu, aga ladwad ja ossad kül olluwa. -

Kohtomees Hindrik Leiter ütles, nema omma kül Aadam ja Hindrik Uibo muro päält kõiwo puid ja osse löidnuwa, ja kõiwo puid ollew riita pantu ollu, tema om werewa kriidiga puu otse pääle kirjotanu, - aga kas no puu kroono mõtsast warastedu, ehk muialt toodu, tood ei wõida ütelda ei ka teeda. -

Aadam ja Hindrik Uibo ütliwa, et nema talwel kroonomõtsast ei ole üttegi kõiwo ei ka muud puud warastanu, ei olla ka keäki näid kinni  wõtnu. - Nema olewad minewa talwel omad puud omast mõtsast ragunuwa ja wedanuwa. -

Mõtsawaht Jaan Juust ütles, et Jaan Maala, Johann Laul ja Johann Mägi woida tunnistada, et Aadam ja Hindrik Uibo kroonomõtsast talwel puid warastanu. -

tunnistaja Jaan Maala tunnistas, ta om talwel ennegi nännu, et kroono mõtsan raoto puije kande om olnu, aga kes warastanu om tood tema ei teadwat, suwwel om ta nännu, et kannu kroonomõtsast omma wälja puhastedu ja tema niitu pillutu, muud ta ei teedwat. -

Johann Laul ütles, kroono mõtsast om puu wedamise tee lännu Aadam ja Hindriki Uibo usaida, sis olla mõtsawaht Jaan Juust tema manu lännu ja ütelnu, et mesperast kroono mõtsast puud omma warastedu, - tema Johann Laul - om sis Jaan Juustile tee näidanu, ja Jaan Juust om teed mööda Aadam ja Hindriki ussaida lännu, ja puud sääl löidnu. -

Johann Mägi tunnistas niisama, ja weel: Katre Juust olla temal käsknu mõtsawahile üles anda, mes Aadam ja Hindrik Uibo kroono mõtsaga tegema, 

Pääle to olla ta nännu, kui suwwel Aadam ja Hindrik Uibo omma kroono mõtsast kande puhastanu ja niitu pillunu. Nii om ka Jaan Uibo kõnelnu.

Tunnistajide perra arwas kohus, et Aadam ja Hindrik Uibo omma no kõiwo puud kroonomõtsast warastanu, ja saÿ

Moistetus:

Aadam ja Hindrik Uibo peawa mõtsa herrast paale pantu trahw 29 Rubla 1 kop. puu warguse eest 8 päiwa sisen kroono kassade sisse masmises - kogokonna kohto man ära masma.

Kohto otsus kuulutedi kohton käüjile 1860 aastase Liiwi maa talorahwa sääduse raamatu §§ 772 & 773 oppusega, ja Adam ja Hindrik Uibole täht wälja antus, suurembat kohut käwwa. -