Jakob Wassil tunnistas: tema om sängin ollu, sis om kõrdimees tema sängist wälja wisanu ja een wälja ajanu, - tema om sis Kõrdsi wööruse läwe pääl saisnu, ja kuulu kui Hindrik Peterson on Albret Asseruse käest nõudnu: "Kas sul pistulit ja wäist om, - kas kerikude läät pistoli ja wäizega, - kas palwe maija läät pistoli ja wäizega. - kas kohto manu läät pistoli ja wäizega, - kas körtsi tulet pistoli ja wäizega; - to ega küsimise pääle olla Albret Asserus ütelnu ei ole pistolit ei ka wäist; - sis om Hindrik Peterson ütelnu, - ange walu. -

Sis omma Härman Kiiwid, Willem Kaur ja Hans Teder, ja Hindrik Peterson Albret Asserust pesma nakanuwa. - Hindrik Peterson om kinni pidanu, ja tõise omma löönu. -

Perast pesmist - olla Kartusow ja Hindrik Peterson Albret Asserust ära saatma lännuwa silla poole alla, sis omma sääl saisnuwa, ja Hindrik Peterson om tullu tagasi ja ütelnu, et tema om kübära ära lahknu. -

Nikolaÿ Kartusow olla Oru kõrdsi man teda ähwardanu, et ei tohtwat kõnelda, et sis peawad tema  - Jakob Wassil - oma elu kaotama, - tolle perast ei ole tema tohtnu seeni ajani awaldada. -

Hans Teder ütles, teda olla Kartusow kõrdsist wälja pilnu, - sis tema olla ka lännu Albret Asserusele lööma, - aga löök olli lännu Hindrik Petersonile, - rohkemb ta ei olla löönu. -

Willem Kaur ütles; Kartusow olla tema kätpiti wälja wisanu. - Kartusow olla käsknu neil kõnelda, et Jakob Wassil ja Hindrik Peterson olla Albret Asserust saatma lännuwa. - ja olla Kartusow Hindrik Petersonile 3 pudelit Pairast andnu. - Kartusow olla ütelnu, - kui te midagi kõneladi, sis ma taha teile näidata laske, - ja lubanu pessa laske. -

Willem Kaur ütles, et Kartusow olla ta wälja wisanu, Albret Asserust pesma. -

Herman Kiiwid ütles: Kartusow olla tale pool nakla nolli andnu, - tema olla ka to eest raha paknu, Kartusow ei ole raha wõtnu. - Kona Asserus om wälja wiidu, tood tema ei ole nännu, - ta om wälja lännu, sis om jo Asserust pestu, ja kõrdsimees saisnu wööruse läwe pääl. - Tema - Härman Kiiwid - om tahtnu sisse tulla, Kartusow om rusikuga rindu löönu ja ajanu Albret Asserust pesma, - tema om sis lännu. - Pääle too - kui tulema nakanud, om Kartusow pairast wälja toonu; - kelle poolt to olli - tema ei teedwat. -

Karl Nautz tunnistas, - tule omma ära kistutanuwa een kõrdsin, sis om to waije sisen Asserus wälja wiidu. - kes wiija olliwa, tood ta ei olla nännu. - Om sis wäljan kuulu suurt lärmi. - Om lännu wälja kaema, ja om nännu kui Asserust om pestu, - ja om tema ära tullu, ja kiiki sinnä jätnu. -

Weel tunnistiwa: Kartusow olla ütelnu mul om kohto kull hendast, ma woi teta mes ma taha; - ja om sis oma koera lawwa pääle tõstnu, - to olli toll päiwal, kui edimäne kuulamine olli, ja weel otsust es saa. -