Moisa herra C: W: Beitler kaibas: Aadam Purmaski tütär Miina Purmask om ollu moisa linno karjus, tema om oma linnud halwaste hoitnu, ja om kiik moisa keswa ja kaara nurme linnudega ära söötnu, - pääle selle om tema neid ka nällutanu, ja ei ole sukugi häste hoitnu. -

Ütskõrd, kui Miina Purmask jälleki zirgud olli moisa keswa lasknu, om härra kõiwo küllest ossa murdnu, ja Miina Purmaskit hirmutanu. - Too pääle om Miina Purmask Zirgud sinnä paika jätnu, esi ära pagenu esa manu, ja esa ütelnu, et sul ei pruugigi enamb tagasi minna, - ja tollest saandi om Miina Purmask kodun, to om ollu 20 Julil. -

Herra Beitler om Miina Purmaskid latsest saandi kaswatanu, koolitanu seeni ajani, nink nüüd om ta ära lännu, sis nõwwab Herra Miina Purmaskid tagasi; kül esa Aadam Purmask tijab kos tema om, - Miina Purmask om 44 päiwa teenistusest ära ollu ja Härra nõwwab puudunu päiwi eest a' 20 cp. = 8 Rb 80 kop, mes esa Aadam Purmask peab wälja masma, selle et tema süü läbi tütär moisa teenistusest om ära lännu, ja nõwwab hommenes jo tütärd teenistuste tagasi. -

Aadam Purmask salgap kiik ära, et tema ei ole tütärd nännu, muud kui ollew kuulu, kui härra om tütärd pesnu, ja tütär Miina Purmask om sis esi ära pagenu to pesmise pääle oma ristiema poole Widriki karjanmoisa Ojamale. Aga et tema tütrele kurja nõwwo olessi andnu, tood tema ei teedwad. -

Moisteti:

Et esa Aadam Purmask ei ütle teedwad tütre ära minekid, ei ka ei ütle üttegi kurja nõwwo andnu olewad, muudkui kuulu, et härra om pesnu, nink et üttegi tunnistajid ei ole, sis peab Miina purmask teenistuste tagasi tulema, nink - kui teda Widrikin peas peetama - massawa 20 kop. päiwast trahwi. -

Et Miina Purmaskil massa ei ole, ja awalikus es saa, et Esa ära mineki man süüdlane olessi - sis ei woi härra to 44 päiwa eest midagi nõuda, enge kui asi awalikus saap, kes süüdi om, sis süüdlase käest. -

Kohto otsus kuulutedi sääduse raamatu §§ 772 ct 773 oppusega-