Pisso kõrtsimees Johann Kallion kaibas: "Minno keldren om ütte wõls-wõtmega kik minnewa suwwi käutu, ja minnol om nüüd ilda aigu 79 puddelit penikest wiina katte näddala aja sissen keeldrest sallaja wälja weedu. Jaan Joakiti käest sai minna minnewa näddala ütte puddeli penikest wiina kätte, eddimelt salgas Jaan Joakit kik ärra, et temma mitte minno keldren ei olle käunu ei ka wiina warrastanu, ent tõisel päiwal tunnistas Jaan Joakit ärra, et temma om 6 kõrda minno keldren käunu ja egga kõrd om ka Ado Lüüs ütten olnu, nink se wõls-wõtma ollewat temma Ado Lüüsi käest sanu. Jaan Joakit ütles ka, et temma Hans Piir'iga om 2 kõrda keldrest wiina warrastanu."

Jaan Joakit astus kohto ett enink temmale om se Johann Kallioni kaibus ette loetu, selle päle kostis Jaan Joakit nidate: "Se om õige, et minna Pisso kõrtsimehhe Johann Kallioni keldrest penikest wiina puddelidega olle warrastanu. Se minno Johann Kallioni keldrest wiina-wargus allustas minnewa suwwel enne Janipäiwa, nink minna olle 8 kõrda ütsinda keldrest wiina warrastanu ja 4 kõrda olle minna Ado Lüüsiga keldrest wiina warrastanu, egga kõrd wõtse Ado Lüüs wiinapuddelid ütten, nink Ado Lüüs pandse minno sis keldre ette wälja wahhis. Minnol olli keldren käumisse tarbis üts wõtti ehk muuk-raud, keddas Ado Lüüs minnole om andnu. 

Hans Piir'iga olle minna 2 kõrda Johann Kallioni keldrest wiina warrastanu."

Ado Lüüs astus kohto ette nink om temmale se Johann Kallioni kaibus ja Jaan Joakiti tunnistus ette loetu, selle päle kostis Ado Lüüs nidate: "Se ei olle mitte õige, et minna Jaan Joakitile olle wõtma ehk muuk-rawwa andnu, ja ei olle minna kunnagi ütsinda, ei ka Jaan Joakitiga Pisso kõrtsimees Johann Kallioni keldren wiina wargil käunu, nink ei olle minna ka mitte Jaan Joakiti käest üttegi wiina-zilka, weel wähhemb ütte puddeli täut wasta wõtnu. Minna olle kül üts kõrd Karl Wärtoniga Jaan Joakiti  käest ütte puddeli sissest wiina juwwa sanu, selle puddeli sissen olli weidi nink jäi meidest sinna puddelile weel wiina perra. Se puddel jäi Jaan Joakiti kätte. Se olli enne Märti päiwa näddalit."

Kui Jaan Joakit Ado Lüüsi tunnistust omma kõrwaga olli kuuldnu, sis küssis se koggokonna kohhus Jaan Joakiti, kas temmal tunnistajat om üllesanda, kes sedda selges teggewa, et Ado Lüüs temmale se wõtma ehk muuk-rawwa om andnu. Sellepäle kostis Jaan Joakit: "Minnol ei olle selle ülle üttegi tunnistajat üllesanda, sedda olle minna Ado Lüüsiga sallaja tallitanu. Kui minnol keldre wõttid tarbis olli, andse Ado Lüüs wõtme minno kätte, nink kui Ado Lüüsil jälle wõttid waja olli, sis andse minna henda käest ärra Ado Lüüsile." 

Minna olle üts kõrd perris keldre wõtmaga keldrele läunu nink säält wiina wälja toonu."

Hans Piir astus kohto ette nink temmale om se Jaan Joakiti tunnistus ette loetu, selle päle kostis Hans Piir nidate: "Se ei olle mitte õige, mes Jaan Joakit minno ülle om tunnistanu. Minna ei tija sellest Johann Kallioni keldrest wiina-wargussest middake, minna olle sellest wargussest puhhas. Üts kõrd pühhapäiwal päle lõunat lätsi minna Pisso kõrtsi mant omma koddopole, sis kutse Jaan Joakit minno omma kambrede nink andse minnole wiina juwwa. Minna küssisi Jaan Joakiti käest, kost temma selle wiina om sanu, selle päle ütles Jaan Joakit, et temma om keldre wõtme tarrest wõtnu nink sis keldrele lännu ja selle puddeli keldrest wälja toonu."

Jaan Joakit kostis selle Hans Piiri wäljaütlemisse päle nidate: "Se om kül õige, mes Hans Piir om tunnistanu, minna olle temmale kül wiina juwwa andnu, ent temmaga (Hans Piir'iga) ei olle minna mitte keldrest wiina warrastanu."

Tunnistaja Rein Wernik andse nidate tunnistust: "Oktobri kuu lõppetussel, s.a., tulli Jaan Joakit minnole Pisso kõrtsi lähhedal wasta nink temmal olli 4 puddelit wiina pihtsärki pihta pantu ja ütles, et temma lähhab Leese tallo."

Jaan Joakit kostis Rein Werniku tunnistusse päle nidate: "Se om õige, et minnol sis 4 puddelit wiina ütten olli, nink selle wiina olle minna Leese Ado Lüüsi kätte andnu, ent selle andmisse man es olle üttegi tunnistajat."

Tunnistaja Isak Lazarus ütles et temma sellest wiina wargussest middake ei tija tunnistust anda.

Tunnistaja Peter Raggul andse nidate tunnistust: "Meije mängseme Pisso Jaan Kulti tarren kaarte, Märt Särremat, Rein Zimmer, Kristjan Mõttus, Ernitz Reiljan ja minna, sis tulli Ado Lüüs ka meije kaardi mängu manno ja mängse meijeka ütten kaarte, nink Ado Lüüsil olli sis üts wiina puddel särgi taskun."

Ado Lüüs kostis selle Peter Ragguli tunnistusse päle nidate: "Minnol es olle sel kõrral üttegi tühja ei ka täut puddelit taskun, se om wõls, mes Peter Raggul om tunnistanu."

Tunnistaja Johann Will andse nidate tunnistust: "Jaan Joakit om minnole 2 puddelit wiina andnu, ütte puddeli Pisso kõrtsi man, ja tõise puddeli Kerku Allakõrtsi man."

Jaan Joakit tunnistas tõtte ollewat, et temma Johann Willale 2 puddelit wiina om andnu.

Selle kohto een om ülles antu, kumma Jaan Joakiti käen wiina omma nännu, ja kumma temma käest wiina omma sanu:

Rein Wärnik	4 puddelit
Peter Raggul	1  "
Johann Will	2  "
Peter Mürk	1  "
Rein Pik	1  "
Ado Joakit	1  "
Jaan Kult	2  "
Jaan Joakit, Pulsti minna	2  "
wenne mattusse man	1  "
Leese tallo weenu	1  "
Leese tallo Ado Lüüsile antu	2  "
Üttekokko	18 puddelid

(Ado Lüüs andse tunnistajid ülles: Märt Piir, Jaan Kult ja Karl Raam.)

(Päkohtomees Märt Lüüs XXX)

Kohtomees Karl Wernik XXX

  "  Juk Hansi XXX

  "  Peter Treumuth XXX

  "  Rein Mendik XXX