Tüdruk Sohwi Kender kaibus: "Arwata 4 aastat taggasi nakkas Jakob Thal minno hendale keeldma kui keski minno hendale kossida tahtse, ent nüüd kewwade 1876 nakkas temma minno kiusama, ehk minnoga lihhalikkult kokko ellama, ni et minnol sel 21. Septembril 1877 üts poig sünnis. Minna nõwwa nüüd Jakob Thal käest, kes selle latse essa om, selle latse kaswatamisses abbi."

Jakob Thal kostis selle kaibuse päle nidate: "Se ei olle mitte õige, et minna Sohwi Kenderiga lihhalikkult kokko ellanu olles, nink ei olle minna ka Sohwi Kenderit hendale keeldnu. Sedda ei olle minna ka nännu, et keski Sohwi Kenderi man olles magganu.

I. Tunnistaja Mai Jurrask (Lutteri usko) andse nidate tunnistust: "Sedda wõi minna tunnistada, et Jakob Thal wäega saggedaste minnewa suwwe aasta eest ööse sääl kambren käwwe, kun minna omma katte latsega ja ka Sohwi Kender maggasi, nink Sohwi Kenderi man käwwe, nida sammute käwwe Jakob Thal minnewa talwe Sohwi Kenderi man, kellega temmal sobbrus näkku ollewat; ent muud keddagi es näe minna sääl käiwat."

I. Tunnistaja Jaan Anzow (Kreeka usko) andse tunnistust, et temma selle asja ülle middake tunnistada ei tija, ei ka nännu, et keski pois Sohwi Kenderi man olles magganu. 

I. Tunnistaja Leno Raat (Lutteri usko) andse nidate tunnistust kui Mai Jurrask om tunnistanu.

I. Tunnistaja Ann Kolk (Lutteri usko) andse nidate tunnistust: "Minna näggi kül, et Jakob Thal minnewa talwe mõnni kõrd meije pool Maddise tallon käwwe õddakutsel ajal, agga sedda minna mitte tunnistada ei wõi, et nemma lihhalikkult kokko ellanu. Ent se kül om õige, et Jakob Thal ja Sohwi Kenderi wahhel sõbbrus olli."

Jakob Thal andse ülles, et David Kender, maja perremees, essi poisse selle tüdruku manno om tonu, se om Jaan Pundetok, Wastse Anzla wallast, ja tunnistaja Weidenbaum, selles 22. Detsembris s.a. ette tallitada.

Päkohtomees Märt Lüüs XXX

Kohtomees Jaan Treumuth XXX

  "   Werdi Leinus XXX

   "  Andrus Püwwi XXX