Wana Koiola kogokonna kohtun, Wissel, sel 22 märzil 1871.

Man olliwa kohtowanemb Jaan Pihho

                      kohtomees    Peep Tobree

                            do             Johan Keerd

Jaan Kurrusk Põlwast kaibap Wana Koiola moisa kõrtsi naise Sophie Kolk pääle, et tema talwel külma ilmaga kübara tema pääst ära wõtnu - nii et tema 10 wersta ilma kübarada pidanu kodo tulema. 

Sophie Kolk oma eestsaisjaga wastutas et mina toije pangega wee kõrtsi, nink omma see wee ilma lubata kortsist ära weenu ja ei ole pangi tagasi toonu, om pangi ära wõtnu - nink kübara ka üttelden kui pang wet kõrtsi toot saat oma kübara kätte, ent pois om sõimates ära lännu ja oma kübara sinna jätnu.

Jaan Kurrusk pand tunistajas Mihkel Kerro Peter Nikopensius Jaan Ortin Karel Kurruson.

Mihkel Korro and tunistust: Kellamehe sulane Jaan Kikkas toije eesmalt pangi kiige weega wälja, ja joot omale hobesele ära, ja meije joodime kiik sest pangist, kõrdsinaine wõtte Jaan Kurrusoni käest kübara, sest Jaan Kurrusk joot ka kül hobest kortsi man, nink üttel teeje olet ütte wõõra mehe ja tahat ära minna, ent tooge wesi pangiga ära, sis saate oma kübara kätte.

 Peter Nikopensius and tunistust: "Jaan Kikkas toije wee wälja joote ära ja meije kiik joodime hobese, kõrtsi naine tulli wälja ja ütte poisi tooge wesi ära, ma wõtta ütte pääst kübara ära - nink wõtti Jaan Kurrusk pääst kübara.

Jaan Ostra and wastust meije tulline perran sinna, mina es näe muud kui Jaan Kurruskil oli küpar ära wõetu.

Jaan Ortin and tunistust, meije tullime perran sinna, mina es näe muud, kui Jaan Kurruskil olli küpar ära wõetu, nõus omma kübarat tagasi. Kõrtsi naine es ütle midagi; ent kõrtsi mees üttel wotta pois oma kupar ära, Jaan Kurrusk üttel, mes ma sis wõtta kui kolm kõrd küsetu. -

Karl Kurruson and tunistust, mina es ole sis sääl, kui tüli olli, kui ma sinna sai, sis tulli kõrtsimees wälja üttelden, pois tule wälja palle andis ja wõtta oma kuppar ära. 

Sophie Kolk pand omalt poolt tunistajas soldat Jaan Kusnetz ja Jaan Sperling.

Jaan Kusnetz üttel wälja:" Kõrtsi naine tõije pangiga wee kõrtsi, Põlwa puu wedaja weiwa wälja joodiwa omile hobesile ära, kui kortsi naine neil wet käsk asemele tuwwa, naksiwa kiik kõrtsi naist trotsma, seepaale wõt sis üttel kübara ära. Sis nakkas Jaan Kurrusk kõrtsi naist sõimama, neide sonnoga, jämme pak kas sina meile wet ei wõi tuwwa! Sis tülli perast kõrtsi naine pak kübarat tagasi, ent pois üttel mina taha kõrtsi naist opata pand shalli päha, ja läts omma teed.

Jaan Sperling tunistust om niisama kui Jaan Kusnetzal.

Jaan Kikkas wastutas mina toije kül pangi wälja, ent toise wõttiwa mino käest ommi hobeste joota, wet tagasi wiija läts meelestki kogoni.

Mõistetu: Et Sophie Kolk sugugi süüdlane ei ole et tema oma pangi läts takan otsma, kelle käest löuden ka kübara ära wõtt. Katte tunistaja wälja ütlemise perra - weel kõrtsi naist sõimanu, oles na kiik trahwi wäärt, kui Sophie Kolk seda oles nõudnu. 

Et Jaan Kikkas ilma lubata pangi wälja toije, ja Jaan Kurruskil andse, olli Jaan Kurrusk sest prii peap Jaan Kikkas, see kübara wotmise eest kelle suu pääle see sünde 2 rbl Jaan Kurruskile masma. Sophie Kolk peap aga sis kübara ära andma, kui temale pangi wõtja wee ära wiip, mes ka niisama Jaan Kikkal tulep tetta. 

Kui ta seda ei tauda massap ta weel 3 rbl trahwi. -

Kohtokäüjile otsus ette loetu, suuremba kohto kaumise säädus § 772, 773 n 774 perra kulutetu.

Jaan Kurrusk pallel protokoll wälja mes ka lubatus saije. -

                                 Kohtowanemb Jaan Pihho

                                   Kohtomees     Peep Tobree

                                      do                 Johan Keerd

                                            Kirjotaja P Black