Wana Koiola kogokonna kohtun, Wissel, sel 26tal april 1871.

Man olliwa kohtomees  Peep Tobree  XXX

                   kohtomees   Johan Keerd  XXX

         abi kohtomees       Mihkel Kurwitz  XXX

Mihkel Rästas oma eestsaisja Peter Rästaka kaibawa et Johan Plakso om sel 22 märzil s.a. Wisse kohtomaja mant kodo minnen tee pääl järgi lännu, nink raha nõudnu, mes tema paiwa muide nalja jutto perra kuulnu, "et sandi poojal om paljo raha". Kui tema üttelnu et minol raha ei ole, sis nakanu hirmast teda pesma, om saap jallast kübara pääst nink üleultse kiik rõiwa ümbrelt ära kisknu, nink teda iho alaste polwini lume sisse tahtnu pessa. Kui tema sääl tanitanu ja kedagi api ei ole jõudnu, sis om Mihkel Rästas Wisse kaupmehe maaja mano saanu ära paeta kohe Johan Plakso teeda mõrtsuka kombel takan ajanu, kui kaupmees Pihho teda sisse lasknu om Johan Plakso teed mööda alla poole ära joosnu. Pand selle pääle tunistajas Jacob Aumann, kaupmees J. Pihho, nink kirj. P Black, kee nanu kui tema weritselt käest ära saanu pageda.

Jakob Aumann and tunistust, kui üts nurme pääl rööknu, om Johan Plakso helu ka sääl olnu, mes tema selgest ära tundnu.

Kaupmees J. Pihho and tunistust, kui Mihkel Rästas mino usse takan appi tanit:"et ära tap" see pääle sai sisse lastus, kon ta iho alaste olli, nink hamba suust maha pestu, nink nägo weritses löödu, sis üttel et see tema pesja om Johan Plakso olnu. Pihho om ka nännu kui sis sama üts tema poodest mööda joosnu om üts kott saljan olnu,  see kord "poisi wälja ütlemise perra om ka Johan Plaksol oma soola kott ütten olnu, kui teda rööwse. -

Kirjotaja Plack and tunistust: Kui Piho minno üle kaeda kelle pool mina ööd too kõrd olli, nink seda poisi minol näut sis olli tema kogoni iho alaste nink weritses pestu  - om kui Piho tunistusen üten antu. Nink lätsime jala päält Piho nink Jaan Pikk teda takan otsma, teed mööda nii kawweste kui Himaste külla 2 wersta maad, ent Johan Plakso olli henda Tilsi weski mano ara peetnu. Kui ta homogu Himaste külast läbi lännu om Jaan Black tema käest kusinu, kui tal soola kott sälan olnu, kos sa läät, sis om Johan Plakso perst laku andnu nink mööda lännu.

Johan Plakso and wastust tema ei ole kedagi pesnu, tema om Wisselt selsmal odangul kodo ära lännu.

Johan Piho nõwwap oma rõiwa kahjo mes tema selle rööwitu poisile ümbre andnu nimelt:

1 paar saapit         2 rubl 20 kop

1 paar pükse         1   -     50 kopk.

1 müts nink hame 1 -

             -----------------------------

                               4 rubl 70 kop.

Moistetu:Tunistajide wälja ütlemise perra om selgest nätta et Johan Plakso see rööwli olnu - nink kogokonna kohtowanemba nink wöörmöndre üle kaemise perra et see pois hirmsal wiisil ära pestu olli saap Johan Plakso se 30 witsa lööki nink peap riisutu roiwa kahjo 5 rubl J. Pihole 14 paiwa sisen ära masma.

Johan Plaksoga om joba mitto ja mito kõrd warguse asja ette tulnu ent nuud julgup joba rööwli ametit pidama nakata. 

                    Kohtowanemba eest kohtomees  Peep Tobree  XXX

                                                          kohtomees  Johan Keerd  XXX

                                                  abi  kohtomees   Mihkel Kurwitz  XXX

Kohto kaujile otsus ette loetu nink suuremba kohtokäümise säädus § 772, 773, n 772 perra kuulutetu.

Johan Plakso ei ole selle kohto otsusega rahu pallel protokoll wälja mes temale ka lubati. -

                                                 Kirjotaja P Black

                                                                                                                                          #

Mann olliwa Peep Tobree  XXX

                       Mihkel Kurwitz  XXX

                       Johan Keerd  XXX

Kui Johan Plakso, saije tämba Mihkel Rästas kaibuse asjan rööwmise perast kogokonna kohto ette kutsutu, sis nakas kohut sõimama nink röökma neide sõnnoga "kurat sino sisse, kas mina teid pelga nink muid weel häbetu sõnnoga.

Mõistetu: Saaratse habemata kohto een oleki eest saap Johan Plakso 20 witsa lööki. -

Otsus ette loetu nink suuremba kohto kaumise säädus § 772, 773 n 774 perra kuulutetu. -

                        Kohtowanemba eest Peep Tobree  XXX

                                        Kohtomees Johan Keerd  XXX

                                abi        -              Mihkel Kurwitz  XXX

                                            Kirjotaja P. Black