Kolmas kohhus selsammal päiwal:

Mõtsawaht Jaan Uibo tulli mõisawallitsuse nimmel ette kaiwas, et Sõrreste mees Jaan Haak om Mättistu majast wanna peremehhe Adam Raig käest, kes Wennemale läts, ööse 2 koormat õlgi ostnu ja päleki rahha ütte jao masmata jätnu. 

Sõrreste mees Jaan Haak üttel: Minna tõi kül walge tullen kui jo rahwas majan kedrasiwa 2 koormat arwata 120 kubbu õlgi; ent 300 kubbu päle olli kaup tettu ja käe rahha olle minna 3 Rbl. andnu nink 1 Rbl. 40 kop perran kui õlle olliwa ärra widu; ent 70 kp. ja selle masmata et punna arwu perra üts 16 punda pudus olli. 

Selle päle küsse koggokonna kohhus, kui sinna tohtset ni wisi öse warga wisil õlgi wija, ehk ülleüldse ütte rentniku käest osta, kui ommeti selgest teda, et rentnikkul sedda õigust müwwa ei olle? Jaa Haak wastud: Minna paljude käest ostnu ja osta ikkes päle selle, kost minna temma õigust tija.

Juhhan Lodus tunnist: Meije maggasime joba kui se Sõreste mees sinna tul, wõt tule üles, mes pääle ka Adam üles tul ja minna ka ai. Sis lätsime rehe ala, sääl pannime kats koormat õlgi pääle nink et Sõreste mees nurisi, et wäikese koo, wisas Adam weel 5 kubu pääle kauba. Raha es ütle ta hendal olew ja lubbas edespidi massa. Ent et ta iks weel kunnagi masma es tule ja Adamil mineki päiw joba käen olli läts ta esi perra, tul koddo ja näüdas raha nink üttel wesiste silmiga: 1 Rbl. 40 kp saigi, sund no taagi sinnä, Jummal masku esi selle halwa tee perast mo hobese aajamist. 

Kohtu otsus: Et tunnistus selge, et temma ööse kui warras ne õle om winu ja päleki raha kiik ära ei ole masnu peap Jaan Haak se puudus jäänu rahha 3 Rbl. 70 kp. perisherra ja 3 Rbl. warguse trahwi koggokonna waeste laati katte nädali sisen ära masma.

Sai kohtu otsus ja § 773 ja 774 kohtun käüjäle kulutedus. Ent mõtsawaht es ole rahul nink palus Protokolli, mes ka sai lubatus.

Pä kohtumehhe asemel Peter Mandli

Kohtumehhe abi H. Tillmann

 Kohtumehe asemel Adam Lukkatz

Kirjutaja P. Undritz