Karraskij Jusal sel 20. Oktobril 1872.

Ette tulli Krootusest Kinda Mihkli Traat ja kaibas Taniel Kärnäri naise Ann pääle, et se ollew temma rendi rahha 41 rublat hõbb., mes üts Krotuse walla poisikenne Jaan Kebja, temma lawwa päält olli ärra warrastanu ja tõisel hommongul Karraskij walda tonu; et Tanieli naine Ann ollew se rahha wasta wõtnu. Kutsuti poisikenne Jaan Kebja Krotusest sija kohtu ette ja küssiti kas temma om sedda rahha wõtnu? Se üttel ilma salgamata: Ma wõtti kül se rahha Kinda Mihkli lawwa alt maast,(rauduga nahk kotti seen) ja tõije sija Karraskij walda Kosso Tanieli naise Ann Kärnari kätte, se wõt mo käest se rahha wasta ja pand omma puhhu; ent Taniel ei tija tost rahhast middagi. 

Ette kutsuti Tanieli naine Ann Kärnar ja küssiti, kos temma se poisi weedu rahha 41 Rublat hõbb. om pandnu? Se üttel sure wabbandamisega: Se pois ei olle mulle üttegi rahha toonu ei olle ka mo silm märastki rahha nännu ei ka kässi wasta wõtnu.

Taniel Kärnär käest küssiti, kas temma naine Ann om sedda rahha temma kätte andnu? Se heit henda põlwile kohtu ette mahha ja üttel süddamest, et temma heng ollew sest puhhas.

Sis kui kiik olli ärra nõwwetu, es wõi koggokonna kohhus selle asja ülle üttegi mõistmist tetta, ja palleldas surembat kohhut sedda asja selletada.

                                                 Pä kohtumees Jaan Tullus

                                             Kohtumehhe assemel Juhann Raig

                                                 Kohtumees      Peter Mandli

Protokoll Keisriliku Wõrro Maakohtule sel 21. Oktobril s.a. antu.