Neljas kohhus selsammal paiwal,

Tulliwa ette Warbussest, Jürrij ja Peter Plaan, ja kaibassiwa (nemma olluwa Pühhapäiwal Ihhamarro kõrtsin), nimmelt Peter üttel, minna saisi tagga kõrtsi läwwe pääl, ja Johan Punna leije mulle Suu pääle ni et werri wälja tulli, Otto Kahn, Jaan Allew ja Adam Lukkatz olliwa mann naggijas, kui minna selle löömisse ülle Johan Punnaga kõnnelema lätsi, sis lõije temma minnole Luwwa Warrega rindo wasta, ja minna tõukasi tedda ni et temma Ahju suu alla mahha satte; sis tulli wäega paljo Karraskij poisse minno ümber, nink nimmelt Mihkli Punna, Johanni poig Jaan Raig, ennegi muid es tunne meije mitte.  Perran sedda lätsime taade kõrtsi, ja nemma tahtsewa ka seal meid ärra tappa. Meije pallelsime sis Kihhelkonna Kohtomeest Michel Raiga, kes meid lubbas läbbi poisse wälja wija, sis tulli jälle Johan Punna, ja kats Wennelast, puu töö teggijat Walge Moisan, ja laijewa meid Tinno Tallole, et meije neide kübbära ärra ollewat wõtnu, meije es lasse neid muido sisse, kui Kohtomees Jaan Wärs sääl olli, kui nemma sisse saiwa, sis kakse jälle meid Michkli Punna juussit pitte ja lubbasiwa meid ärra tappa, Kohtomees Michel Raig tijab sedda selgest kes kakkeluse allustaja olliwa. 

1, Jürrij ja Peter Plaani tunnistaja, tulli ette, Otto Kahr, nink üttel Johan Punna tahtse taga kõrtsist wälja tulla, ent Peter Plan olli Läwwe pääl, ni et Johan Punna, mööda es päse, sis lõije J. Punna Peter Planile suud wasta rusikuga.  

2, Tunnistaja tulli ette, Jaan Allew, nink üttel, minna näije et Johan Punna, tahtse  tagge kõrtsist wälja tulla, ent Peter Plaan olli läwwe pääl een, ni et läwwi jo kitsas olli läbbi minna, ja J. Punna, lõije Peter Plan´il rusikkuga suud wasta. 

3, Tunnistaja tulli ette, Adam Lukkatz, nink üttel, Peter Plaan, sais läwwe pääl, ja Johan Punna tõugas Peter Plaani, mütsi alt ülles ni et müts mahha satte, ja Peter Plan läts Johan Punnaga  tood asja selletama, ja sis tulli tülli. 

4, Tunnistaja tulli ette, Kihhelkonna Kohtomees Michkli Raig, nink üttel, Warbusse poisi, tahtsewa tagga kõrtsist wälja tulla nink es tohhi, sis lätsi minna neid läbbi kõrtsi wälja wiima, ja Michkli Punna joosk juusside sis tulliwa kik poisi pääle. 

5, Tunnistaja tulli ette Johani poig Jaan Raig, nink üttel, küssimisse pääle, se üttel minna ei tija sest asjast middagi, kõrtsin minna küll olli, ja Tinnole lätsi minna ka Essa kässu pääle, ent neid poisse es puttu minna keddagi.

Kutsuti ette Johan Punna, Ja sai küssitus, kas sinna ollet Peter Plan´i löönu? Se üttel minna tahtse läwwe päält läbbi minna, ent Peter nink Jürrij Plan, olliwa teine teise pool läwwe, ja es lasse minnol minna, sis tõuksi minna Petrit Plani, nink perran sedda löije temma minnole kats kõrda ni rängaste et minna mahha satte. Sedda wõiwa tunnistaja tunnistade, kedda ma palle ülle kullelda, nink nimmelt, 1ne Sullane Mihkli Raig, 2, Jakob Troon, 3, Johan Mandli ja 4, Johan Troon. 

1, Johan Punna, tunnistaja, Sullane Mihkli Raig, sai ette kutsutus ja küssitus mes temma om nännu, et tõttet peap ütlema, se ütles wälja, minna näije et Peter Plan, pand Johan Punnale, jalla ette, et temma läbbi minnen tahtse mahha saddada, ja perran sedda läts Peter Plan, Johan Punnaga selle ülle selletamma, mes est sa minnole lõit; ent löömist minna es näe. 

2, Sellesamma tunnistaja, sai ette kutsutus, Jakob Troon, kes wälja ütles et, minna näije kui Jürrij Plan, leije sedda Johan Punna mahha ja üttel mes sinna kurradi könn weel ollet. 

3, Sellesamma tunnistaja, sai ette kutsutus Johan Mandli, kes ka küssimisse pääle wälja ütles, et Jürrij Plan, om Johan Punnale kats kõrda löönu. 

4, Sellesamma tunnistaja sai ette kutsutus, Johan Troon, kes küssimisse pääle wälja ütles, minna ei olle middagi nännu. Kohto Otsus    Koggokonna Kohto, arwamisse ehk moistmisse perra ja neide Tunnistajate wälja ütlemisse ülle, omma ne Warbusse poisi, Jürrij ja Peter Plan, ni kui eddimatse tülli otsja ehk tülli tõstja arwatu, sest et neide omma tunnistaja omma wälja üttelnu et nemma omma läwwe pääl saisnu nink ei lasse muid keddagi sisse ei ka wälja käwwa.  Sis Moist Kohhus eggale üttele 3. rubla trahwi, nink nimmelt, Jürrij ja Peter Plan, kumbgi 3 rubla, nink Johan ja Mihkli Punna, jälle kumbgi 3. rubla, teep ütte kokko 12 Rubla, mes katte näddala perrast peap ärra massetu ollema.  Nink saab sest rahhast 8 Rubla Karraskij walla waeste Laadi ja 4 Rubla Kannepi Kerriko waesti Ladiko hääs sisse massetus, selle perrast et se tülli om Pühha päiwal olnu.  Kohto moistminne ja § 773n. 774 sai Kohtun Käüjätele ette loetus, ent Peter Plan, es olle sellega mitte rahhul ja pallel Protokolli, mes kohhus lubbas ka anda. 

Pä Kohtomees Jaan Tullus  XXX                                       

Manistja  Peter Mandli  XXX

Manistja  Jakob Uibo  XXX   

Wälja antu sel 10.mal Mail 1873.                                 

LS