Karraskij Koggokonna Kohhos Jusal sel 2 Januaril 1876

Tulli ette Krootusse perremees Jaan Hack ja kaibas et om Karraskij wallan seiswa Kokkeri nink Juusa tallo perrisommaniko Hindrik Undritz kätte /150/ üts sadda wiiskümmend rubla neide nimmitedo tallode pääle käerahhas sisse masno, ja ollo leppito et H. Undritz müüp egga Thaler /156/ üts sadda wiiskümmend kuus rubla eest Jaan Hackile, ja nüüd ütles et mitte 156 rubla enge 165 rubla om sull mulle egga Thaler päält massa nüüd palle minna kohut kas andko H. Undritz mulle se leppito hinna eest ne tallo kohha, ehk se sisse masto käerahha taggasi and tunnistajas Krotusse mõisa maa rentniko Jaak Jassik nink Warbusse wallast Johann Kuhhi kes ka temma kauba ülle woiwat tunnistust anda. 

Kutsoti ette Hindrik Undritz ja saie Jaan Hack kaibus ette loetus kos pääle Hindrik Undritz ütles kuis wõip Jaan Hack ni suggotse wõlsmissega ette tulla sest Jaan Hack käwwe mitto kõrda minno mann Kokkeri nink Juusa tallode ostmisse perräst nink masse mulle 150 rubla käerahhas sisse, et tõisele es saas ärra müüdos, sis tulli Jürri Hack temma welli minno manno sest et nemma mõllemba ostja olliwa ja neide ütte jõud manno es nakka, sis ostsewa ülle katte welle minno tolle kohha herra lubbaga, ja lätsime Jürri Hackiga Kannepi Kihhelkonna Oppetaija herra poole kes ni hää olli ja waiwas wõttis nink meile sedda Eenkontrakti kirjot ni kui siin saate näggema, ja pandis tetto Eenkontrakt kohto lawwa pääle.  ja Hindrik Undritz ütles weel et Jaan Hack om ka joba Kokkeri tallo rentnikega wastset kaupa tenno sedda wõiwa ne rentniko Jaan Läwwi ja Jaan Wõsso essi tunnistada, nink kui nüüd ennamb ei olle lusti wõtta sis ütlep et hinda om pääle panto ja tulli ütskõrd minno manno Mäemusti mõisa rehhe alla ja ütles et minna sinno tallo kottosit ei wõtta todda kuliwa ka Märt Toom ja Michel Walge. 

Sai kohto poolt ette kutsotus Jürri Hack nink küssitus sinna ollet ommet Hindrik Undritzega Kannepin olno Oppetaija herra pool ja sääl Eenkontrakt tenno sedda tunnistap ommete se sinnane kontrakt kos sinno nimmi sissen om, too olli teil omma welle Jaaniga iks ni ärra kõnneldo sest egga sinna iks upi sinna es lähha, tolle kohto küssimisse pääle olli Jürri Hack wastus minna sõitsin Mäemusti mõisa nink H. Undritz küsse minno käest kohes sinna sõidat minno wastotaminne olli Kannepi Kerko mõisahe sis üttel H. Undritz mulle kas woit minno ka ütten wija minna wõtsin tedda hendaga ütten nink sõidime Kannepi Kerko mõisa, et minna ütte kontrakti teggema lätsi too ei olle õige ei olle ka omma nimme üttegi kontrakti alla pandno. 

Kutsoti ette H. Undritz ülles anto tunnistaja Kokkeri maja rentnik Jaan Wõsso ja saie küssitus kas ollet käüno Jaan Hacki mann omma maja rentmisse perrast kos Jaan Wõsso ütles minna lätsi Krotoiste Jaan Hack manno ja küsse kas annat iks meile Kokkeri tallo maad rendi pääle woi tahhate essi sisse ellama tulla Jaan Hack üttelno mull om kalli hinna eest ostet kui tahhate mulle massa 190 rubla selget rahha 300 kuppo pikki õlgi nink 30 jalgsi päewa sis tahhan teile teile Jaan Lawwiga mõllembit sisse jätta.   

Jaan Läwwi es olle kohton selle perrast om ka temma tunnistust puudus. 

Otsus  Kohhos mõistis Oppetaija herra tetto Eenkontrakt põhjuse pääle kos nätta om et Jaan Hack kaibus mitte õige ei olle nink nimmelt Kokkeri ja Juusa tallode pääle käerahhas 150 rubla om sisse masno, essi om üttelno et tolle hinna eest ei wõtta sis kaotap omma sisse masto käerahha Jaan Hack tunnistaja Jaak Jassik nink Johann Kuhhi ei olle katte kutsmisse pääle kohto mitte tulno Hindrik Undritz tunnistaja Märt Toom ja Michel Walge es sa kohto mitte kutsotus selle perrast et Jaan Hack mitte tood es salga et om üttelno minna sinno kohtasit tolle hinna eest ei wõtta. 

Sai kohto Otsus ja § 773 ja 774 kohton käiadelle ette loetus ent Jaan Hack es olle rahho et arwas hendal liiga tetto ollewat pallel Protokolli mes kohhus ka lubbas anda.