Karraskij Koggokonna Kohhos Jusal sel 23 Februaril 1876.    

Tulli ette kaibaija Musti mõisa rentnik Heinrich Undritz ja temma kõrtsimees Jürri Saar, Undritz ütles tõisipäiwal sel 17dal Februaril s.a. hommongo kellä ütte aigo lätsi minna Tarto liina sõitma, minno sullane Jakop Trath kui olli obbone ette pandno olli ka maggama heitno, ent pea perrän minno ärra sõitmist kulo minno perrenaine et üts lähhap ussest wälja nink ei tulle ennamb taggasi, temma wõtno tulli ülles kaep pois Jakop Trath om ärra kaono, pannep küll immes ni suggotse tuisotse ilmaga poisi ärra minnekit, ent et jo enne ka olli monnikõrd ööse ärra länno es moista iks weel ni wäega kurja mõttelda.

Hommongo tullep kõrtsimees Jürri Saar rentniko perrenaise poole ja ütlep: minno hobbesega om ööse sõideto ja wäega hirmsaste ärra aeto ni et wai pea ots käen, ja reggi om ka rabbamada linna kiwodega koon, se pääle üttelno minno naine too om sis õkwa meie Jakopi töö, kes tiap mes asja temma sis om ajano, kolmapäiwal tulli minna ka Tartost koddo, kos minno naine kiik ärra sellet mes pääle minno ärra sõitmist olli sündino ni kui ullewan om kirjotet.  Minna löisin ka et too reggi mes weel ilm rawotamatta rabbamatta linnu kiwodega koon olli, lätsin warsti rehhe manno ommi linno kaema kos ka moonamees Märt Toom nink Michel Walge man olliwa, tusin kohhe ärra et olli kõrtsimehhe linna kihhist ni samma ka minno linna kihhist linno ärra kaono, ni et joba minno moonamehhe arro saiwa, ja mulle ütliwa et teie linna töö om õige häste edesi jõudno selle aja sissen mes ärra ollite, sest kiht om häste maddalamp nink rehhe läwwen ollo ka ree jälle. 

Nüüd noudis H. Undritz et arwas kige wahhamb 20 punda ossa linno ärra kaono keskmast hinda 3 rubla egga punna paalt se teep ülle 20 punna 60 rubla, nink kõrtsimees J Saar noudis et om wargose wiesil ööse kats kõrd temma obbone wõtno nink ni armetohe ärra ajano 60 rubla, nink et temmal omma linna ollowa kiik tükki loeto sest et temmal neid mitte liig paljo ei olle ollno, nink 8 tükki linno ärra ollo kaono kos arwas 6 punda linno saawat 3 rubla egga punna päält se om 18 rubla ütte kokko 78 rubla. 

Sai ette kutsotus Jakop Trath nink rentnik H. Undritz ja kõrtsimees J. Saar kaibus ette loetus, kes küll edimält kõwaste sallas nink ütles et temma ennegi jalgsi tüdrikode man om käino, sai kohto poolt küssitus ütle ärra kon sinna ollet käino sis ütles Tiedoküllan wiemate Tiksiküllan, et nüüd näggi et wõlsmissega kaugelle ei sa sis tunnist wiemate kiik ärra ni kui allun om kirjotet. 

Temma ütles minna sain suwwel Saberna kõrtsimehhe Adam Lilliga sõbras, nink minnol olli temmaga weidikesse wõlga, sis üttel Adam Lill mulle et kas sinna sis tassa ei woi tetta, too mulle ennegi mes saat olgo wai lihha luu, ja panne wanna kõrtsi akna mulgost ööse sisse küll minna päiwu ärra sullata, nink edimast kõrda wein minna 4 tükki linno Jürri Saar obbesega üttel pühhapäiwa ommongol enne walget arwata 3 nädalit enne perramast wiemist küsse Saberna kortsimehe Adam Lill käest kohhes panda minna toin sulle linno, sis ütles A. Lill kae sääl om rettel panne wastse kõrtsi lae pääle, nink minna pannin ka kõrtsi lae pääle temma käskmisse pääle nink wõtsin üts wäikenne kümmel naps 5 kopikolinne pak papirosse nink 3 koppikolinne prants sai, sis tullin ärra. 

Pühhäpäiwa keskpäiwa aigo lätsin minna taggasi sis ollewa linna mahha woeto nink saani pääle panto, nink sis masse temma mulle egga tükki päält üts rubla se om 4 rubla ja üts rubla and temma mulle ette käerahhas, et kui jälle toon küll sis tassa saame, ja ütles weel mulle et tee puust üts wõtme muddel nink sis too minno kätte küll minna sis lassen rawwast tetta, et sis wõit sisse minnä kohhes tahhat, nink ütles weel, et kui kiik ni sugotse mehhe ollesi kui minna ja Adam Jansen sis ei olles Saberna mõisast ennemb muud ülle kui üts tuhha hunnik nink temma essi kaono. 

Kui minna nüüd teist kõrd Jürri Saar obbesega linno wein sis olli mull 7 tükki se olli toisipaiw sel 17 wasta 18 Februari sis es tulle kõrtsimees mitte linno wasta wõtma es tee ka kõrtsi ust mitte wallale, es sa ka mitte sisse ennegi minnol olli joba teedä kohhes linna  piddin pandma, nink topsen wanna kõrtsi akna mulgost sisse ja tullin ärra.  perrän tõise kõrra linna wiemist saatis Adam Lill mulle üts kirri kos sissen olli kirjotet, rahha mull ei olle sulle nüüd mitte wõimalik anda, sest linna ommawa rabbamata rent om mull massa küll 8 Märtsil kuu päiwal saat ja kirjotet, et kui sedda kirja ollet läbbi luggeno, sis kohhe arra pallotada, minna teggin ka nida ja wissasin pliidi alla nink pallotasin ärra.  Kui Karraskij Kohtomees Jakop Uibo Musti mõisa tulli nink minno tasko läbbi otse sis olli mull puust tetto wõtme muddel taskon minna wõtti töö walmis tette mudel pannin keelo otsa suhho purresin ammaste wahhel katski nink perrä wõtse kohtomees minno suust ärra. Sai kohto poolt küssitus kelle lukko perra sull too wõtti olli tetto, sis utles Tõlla hone lukko perra. 

Kutsoti ette Saberna Kortsimees Adam Lill ja sai Jakop Trath kõnne ette loetus, kes selle pääle ütles too om õige et temma üttel pühhapäiwa ommingo enne walget linno tõi, nink ütles et minna tahha neid Walgjerwe emma poole rabama wija wai ostat sinna ne linna minno käest ärra, tolle pääle ütli minna, et nuud om weel öö ja minna enne walget ütteki asja wasta ei wõtta, kui tahhat sis tulle päiwä küll minna sis sinno käest tahhan neid ärra osta, sis länno Jakop Trath ärra. 

Pühhapaiwa paiwa tulno Jakop Trath tagasi ja sis müüno 4 tükki linno 4 rubla eest ärra kos man ka Krotusse wallaperremees Wilhelm Kriesa man olli todda woip temma tunnistada toine kõrd linna toomisest ei olle minna Jakop Trathi nänno ei ka temma linno ei olle ka wasta wõtno ei olle ka mitte käskno üttestki mulgost sisse panna tollest ei tija minna midägi üttelda, minna essi ka tusin et sinnä linno olli pantu, sest et linna kiwwo ja luu sääl maan olliwa, enge toogat ehk wiegat ei tia minna.  ööse wõip paljogi minno zea sulgo linno toodos ja wiedos saada, wahhin minna sääl ei saisa.  Kiiki muide punkte pääle ütles Adam Lill ei olle minna üttege kirja saatno, ei olle ka wõtme mudelit käskno tetta, ei olle ka mitte käe rahha andno sest Wilhelm Kriesa olli mann kui minna temmale 4 rubla massin nink mitte 5 rubla warras wõip paljogi tõise pääle omma süüdi kanda et arwap tollega omma wargost kergembas tetta.  

Kutsoti ette tunnistaja Wilhelm Krisa kes ütles kõrtsimees A Lill ütles Jakop Trath tahtse neid linno Walgjerwe rabamisse pääle wija nuud agga müüp mulle ärra sis müüno Jakop Trath noid 4 tükki linno 4 rubla eest ärra, too müüminne ollo kella katte ehk kolme aigo pääle lõuna, sis lännowa kõrtsi nink kortsimees masno okwa temmale 4 rubla leppito hind wälja, todda näggin minna muud ei woi middägi üttelda 5 rubla es sa J Troth mitte. 

Kutsoti ette Wanna Pigaste wallawannemb Peter Kõrda nink Pääkohtomees Johann Janno nink sai küssitus, kui linno otsma lännowa, kas teie linno saalt es löwwa sis ütliwa nemma too olli awalikkolt tutta et linna olliwa mulgost sisse panto sest luu olliwa mulgo all nink linna kiwwo akna küllen, linno es olle kongi leida, kui meie kõrtsimees A Lill käest küsseme et se pois Jakop Trath om sulle jo linno toono, sis kaeno A Lill J. Trath otsa ja üttelno minna ei tunneki sedda poisi, woip olla et ollen tedda ennegi üts kõrd nänno Karraskij Kogokonna kohhos es woi selle asja ülle üttegi otsust tetta nink saap palleldus Keiserlikko Werro Maakohto Otsusse teggemisse alla H. Undritzil se Protokoll sel 27 Februaril 1876 wälja anto.

                        Karraskij Kohtomajan sel 23 Februaril 1876

                                         Pääkohtomees Jaan Tullos

                                            Kohtomees    Jakop Uibo

                                     abbi   -      do -     Johann Raig