Karraskij Koggokonna Kohhus, Jusal sel 14al Mai´l 1876.                                                 

Tulli ette Karraskij Moisawallitsuse assemnik Jaan Uibo, ja kaibas et Musti moisa kõrtsimees Jürrij Saar ollewa Tari Michel Sild,le, 

1. koorma haino müünu, temma tunnistaja ollewa Jakob Traat, kes ni kõwwaste, ja ähwärdamissega üttelnu, kui teije sedda asja ei wõtta kohto ette, sis minna tahha sedda asju perris herra von Moller´il essi kaibata. 

Kutsuti ette kõrtsimees Jürri Saar, sai kaibus ette loetus, kes selle pääle ütles, kui Jakob Traat woip sedda tõttes tetta, et minna olle üts kõrs haino müünu, ammugi koormast ei olle kõnneldagi sis tahha minna kohto poolt kui suurt pääle pantu trahwi kanda, ent kui Jakob Traat et woi omma tunistust tõttes tetta, palle kohhut minno trotsemisse est tedda karristada, minno tunnistaja omma 

1, Michel Sild, 2, Jaan Kauss, 3, Jürri Tõnno, 4 ja 5 wanna ja noor Jaan Tõnno. 

Kutsuti ette kaibaja, ehk tunnistaja Jakob Traat nink sai haina müümisse perrast küssitus, kes selle pääle ütles, jah 3 koormat haino piddi todama, ent 2. koorma jaije Musti kõrtsi mannu, sedda näije minna essi Musti Moisa rehhe allutse wärrete päält, ja tunnistada woip ka Kinda Michel Traat, kelle haina koorma om wasta tulnu. 

1, Kutsuti ette Michel Sild, ja sai küssitus haina ostmisse perrast, kes selle pääle ütles, minno ei olle tinnawo ütte kõrt haina ostnu, ammogi koormat ei ollegi, ent kõrtsimehhel olli abbin weddaman ja panni ka omma koorma kõrtsi laepääle ülles, sedda näiwa Jürri Tõnno, wanna ja noor Jaan Tõnno nisamma Jaan Kauss ka.  kes weddaman olli. 

2, Kutsuti ette tunnistaja, ja weddaja Jaan Kauss, ja sai küssitus mitto koormat haino saije kõrtsimehhe haino, kes selle pääle ütles kolm, 1. olli minna teine olli Tari Michel Sild, ja kolmas olli kõrtsimehhe omma hobbene nink pannime haina kik kõrtsi lae pääle ülles, ja ütles weel, et temmal lännu wanna küüni kotsil ree-perris katski, nink jäänu teisest weidikesses aijas perra. 

3, Kutsuti ette perris tunnistaja, noor Jaan Tõnno, kes küssimisse pääle walja ütles, et nemma weddanowa mõtsast puid ja nännuwa et kik kolm koormat haino olnu kõrtsi läwwel ja aetu kõrtsi pääle ülles ent wanna Jaan Tõnno, es olle tulnu. 

4, Kutsuti ette tunnistaja Jurri Tõnno, kes küssimisse pääle wälja ütles nisamma, kui Jaan Tõnno. 

5, Kutsuti ette Jakob Traat tunnistaja, Michel Traat, kes küssimisse pääle ütles, et ei ollewat öse, ei ka päiwa üttegi haina koormat nännu, nink ütles weel se om puhhas wõlts jutt. 

Otsus  Kohhus moistis, tunnistajate wälja ütlemisse perra, (I)  et Jakob Traat om wõltsi kaibust, Jürri Saar pääle tõstnu, (I) moisa wallitsusse assemniko Jaan Uibo kaibus tühjas, ent Jakob Traat´il.  (et om Jürri Saar trotsinu) 20. witsa lööki, ehk massap 4 rubla hob. waeste laati trahwi, kes sedda wiimast hendal pallel, ent es olle rahha massa kos Michel Traat käemehhes leije, et 8sa päiwa sissen peap käen ollema,

Sai kohtomoistminne ja § 772. n: 773. kohtun kaujatelle ette loetus, ent Jakob Tratat es olle sellega rahhul, et arwas hendal liiga tettu ollewat, ja pallel Protokolli, mes kohhus es lubba anda. -

                                                                           (Allkirri)