Tulli ette Leesmitti Johan Seeme rentnik Jakob Astel ja kaibas temmal ollnu keswa, ja tatriko rehhi ärra pessetu rehhe all, sis om, wistist kin J. Seeme ja Adam Kroon hobbene temma wilja unnikitte pääl söönuwa, ja Adam Kroon ollewa hommungult, Johan Seeme hobbene wilja unniku päält wälja aijanu, nink nõüdis kahjotassumist 1/2 wak keswi ja 1/2 wak tatriko. -

Kutsuti ette Johan Seeme sai kaibus ette loetus, kes selle pääle ütles, woip olla, ent minna ei tija, kui Kroon om wälja aijanu, sis om iks pääl olnu.- 

Kutsuti ette Adam Kroon, ja sai küssitus, kes selle pääle ütles, minna tulli hommungo warra ülles lätsi rehhe alla sis olli J. Seeme hobbene, ei mälleta õigest, kas keswa wai tatriko unniku pääl, ja minna aije wälja se om tõtte, ent minno hobbest es olle tookõrd mitte sissen, woip ka olla, ehk olli temma ka säält söönu sedda minna ei woi üttelda. -

Otsus  Kohhus moistis, et Johan Seeme hobbene om wilja unniko päält wälja ehk kinni wõetu, massap J: Seeme, Jakob Astel´il

1/6 wak keswi, ehk tatriko kahjotassomist. mes 8 1/2 päiwa sissen ärra ärra massetu peap ollema. - Sai kohtomoistminne mõllembille ette loetus, nink lätsiwa rahhun wälja. -

                                                       Karraskij Kohtomajan sel 9al Juli´l 1876

                                                                                                  Eenistja,   Jaan Tullus  XXX

                                                                                                  Mannistja, Jakob Uibo  XXX

                                                                                                   Mannistja, Jaan Leppason  XXX