Tulli ette Karrasky Moisawallitseja H. Sirach ja kaibas et moisa Sullane Kristjan Prun ilma üttegi lubbata om henda teenistusest wallale ehk prii tennu, nink ei lääwat ennamb tööle sest 19.ast Juni´st s.a. ja pallel kohhut omma kahjo perrast, nink ütles weel egga minnol ülle arwo teenijat ei olle woetu.  Ja nüüd sel kallil südda töö ajal lähhab egga üts ni kui tahhap, ja nõüdis nimmelt, toppelt temma Kontrakti perra leppitu palgast. 

Kutsuti ette Kristjan Prun, sai kaibus ette loetus, kes selle pääle ütles - minno om wallale tettu sis olgu ka wallale, tunnistada woiwa Michel Purmak nink Jaan Kõrw. 

Kutsuti ette tunnistaja Michel Purmak, ja sai Kristjan Prun wallale teggemisse perrast küssitus, kes ütles, talli mann es panne minna oigede, suure tülli perrast tähhele, ent kui talli mannt alla poole lätsime, sis üttel wanna Sirach takkast perra, kui ei tahha sõnna kuulda, sis woit minna kike Lastega. 

Kutsuti ette, teine tunnistaja Jaan Kõrw, ja sai Kristjan Prun wallale teggemisse perrast küssitus, kes ütles et wanna Sirach üttelnu K. Prun´il kui ei tahha sõnna kuulda, sis woit minna kike Lastega, muud ehk muide ütlemist ei olle minna kuuldnu, ei woi ka üttelda. 

Otsus  Kohhus moistis, [sest et Perremees ehk Leiba wannemb ei olle henda poolt mitte wallale tennu, ni kui ka Protokoll 45 sest 25al Juni´st s.a. tunnistajatte perra näitap, muide ütlemist ei woi tähhele panda ehk kui arwas sedda ütlemist trotsmisses woino selle ülle kaibata, agga mitte omma wõimoga teenistussest ärra minna,] Kristjan Prun peap hommenetsest päiwast teenistuste minnema, omma leppitu aig illusaste sõnna kuulmissen ärra orjama, ehk kui sedda ei tee, massap aasta palk wälja ni kui kontrakt ütlep, ja lähhap Moisast wälja, mes 8 1/2 päiwa sissen peap täüdetu ollema,  Sai kohtomoistminne, ja § 772. n 773. kohtonkäüjatell ette loetus, ent Kristjan Prun ütles, minna ennamb teenistuste ei lää, nink lätsiwa sonna lausumatta wälja. -

    Protokoll wälja antu sel 29al July 76.-                                    (Allkirri)