Kohto ette tulli Hurmi mõisa walitsus ja kaiwas, et Mihkli Karask ollew oma hobest 6 ööd mõisa ristik hainan söötnu ja nõuab selle eest 6 Rbl. Seda ollew herrä Herzbergile Joh. Teri ja Peeter Naaber kaiwanu.

Mihkli Karask kutsuti kohto ette ja kui temäle kaibdus ette loeti wastutas seesama, et temäl ei ollew enämb hobene mõisa ristikhaina puttunu, kui üts ainus kõrd kui usaija wärat wallale ollew olnu, kona sis ka temä oma naine ja mõisa walitseja lännu sedä hobest ärä ajama, ja walitseja ei ollew selle eest midagi trahwi nõudnu, et see juhtumise asi olnu ja hobene midagi kahjo ei ollew tennu.

Joh. Teri kutsuti kohto ette, kes ütles et Mihkli Karask hobene 5 ööd mõisa ristikhainan kablan om olnu.

Peeter Naaber ütles, et temä ütskõrd om nännu Mihkli Karaski hobest mõisa ristikhainan, ei teedwad mitte kas ta kabla otsan om olnu, ehk wallale.

Jaan Ermel tunnistas, et temä ei ole üttegi kõrda Mihkli Karaski hobest nännu mõisa ristikhainan, ehk temä kül ega õdago mõisa hobese ristikhaina pääle om wiinu ja ega hommoko warra ärä toonu.

Mihkli Tarend tunnistas, et temä ei ollew mitte nännu Mihkli Karaski hobest mõisa ristikhainan ollew enamb kui ütskõrd kona hobene ollew teeweerde kraawi perwe pääle kapla pantu, kost ta ka weitikese ristikhaina puttunu. Õdagult ja hommugolt kui ta mõisa hobesid olli wiinu ja toonu ei ollew temä konagi M. Karaski hobest ristik hainan nännu.

Joh. Teri pallel et täämba mitte kohto otsust kuulutedus es saasi selleperast, et kolmas kohtomees Mihkli Laine tema wihamees ollew ja ollew teda ka ähwardanu, et ta tahtwat temäle näidata, mis ta tette wõiwat.

Otsus: Et Joh. Teri pallel täämba mitte kohto otsust kuulutada selle et kolmas kohtomees temä wihalane ollew, sis jääs kohtomõistmine tõises päiwäs kona abikohtimees ka saap kutsu.