Kohto een kaiwas mõtsasaks Samuel Rõigas, et kats Heisri meest Jüri Waher ja Johan Tina Hurmi mõtsast puid ollew warastanu. Jüri Waher 1/2 süld puid warastanu ja Johan Tina ollew 1 kõiwo warastanu, mis 8 tolli jämme. Nõuab Jüri Waher käest poole sülla puije eest 6 Rbl. ja Joh. Tina käest kõiwo eest 3 Rbl.

Jüri Waher wastutas selle kaibduse pääle, et temä ei ollew puid warastanu, waid aga hakko wiinu, mis niidu puhastamise eest temäle lubatu.

Johan Tina wastutas selle kaibduse pääle, et temä kül üte kõiwo ollew wiinu ilma lubata.

Heisri pääkohtomees Aadam Wõtti tunnist, et Jüri Waher ollew kül 1/2 süld puid Hurmi mõtsast oma kodu wiinu.

Otsus:

Jüri Waher massap 1/2 sülla puije eest 1 Rbl. 50 kop. ja warguse eest 1 Rbl. 50 kop. kokko 3 Rbl. Hurmi mõisa walitsuse hääs. Johan Tina massap selle warastedu kõiwo eest 2 Rbl. selle et seesama ilma ladwata om olnu.

Kui kog.kohtu otsus ja Sääduse §§  773 ja 774 kohtun käüjile ette saiwa loetu, sis olli Joh. Tina ja mõtsasaks selle otsusega rahul, aga Jüri Waher es ole raho ja pallel protokolli wälja, mis temäle ka lubati.

Pääkohtomees Joh. Pähn.

Kohtomees Joh. Purason.

Abikohtum. Jaan Narusk