Tulliwa ette Leesmitti Tallo rentniko, Jaan Wahher nink Karel Kumm, ja kaibasiwa, et Kaska tallo tütriko (Põlgastest) kui nimmelt, Kaska Michel sõssar, Leena Orras, ja Kaska Adam´i tallo tütrik Sohwi Wokk, ollewa neide Niidust hainu poimnuwa, tunnistada woiwat Jaan´i naine, Maie Wahher, kes neid om nännu, ja neide omma karjus, (Serristust Jaan Wisnapuu tüttar) Marri Wisnapu, om ka ütten ollnu, ja üttelnu, meije olleme, Põlgaste Kaska Tallolt, ja nõuudsiwa kahju tassomist 6 rubla hõbb. selle niido poimemisse est, et om rikkutu.

Kutsuti ette Michel sõssar, Leena Orras, ja temma Wöörmünder Jaan Wõsso, (Karraskist) nink Sohwi Wokk, ja temma Wöörmünder, Johan Karrask, (Põlgastest) sai üllewänne kaibus ette loetus, kes eddimalt salgassiwa, ent wiimatti, kui sai perran tullew tunnistus ette loetus, sis jäiwa waik, es moista middägi ennamb wastutada.

Kutsuti ette tunnistaja Jaan´i naine Maie Wahher, kes küssimisse pääle omma tunnistust ülles andis, kui nimmelt, et temma Maie Wahher lännu nimmelt omma Niitu kaema, ja leidnu, et Kaska Michel Sõssar, Leena Orras, ja teine tütrik Sohwi kelle Wäärnimme es ütle teedwat kumb Kasska Adam´i tallolt olnu, nink karjusse ütlemisse perra, kes ka Kasska Adam´i tallolt olnu, ne omma Leesmitti hainamaa päält haino poimnuwa, kui Maie Wahher mannu saanu, ja üttelnu kas teije essi ollete tulnu sija poimama, woi om teid kästu sija tulla, selle pääle ei olle nemma middagi sõnna lausunuwa, ent ollnuwa waik, ja ärra heitinu, nink paggenuwa ärra, sis om Maie Wahher lännu neide poole pääle, kos haina olluwa mahha pantu, sääl olnu üts wäikene lats, ja Kasska tallo werrew penni hainu mann, nink Maie Wahher küssinu selle latse käest, kost noo tütriko omma, kes nida wälja üttelnu, kui üllewan ülles antu om. Sis wõtnu Maie Wahher no haina, ja wiinu Rotti weski mannu, kos se Möldre Johan Karrask, ka Põlgaste kohtomees om, kellel temma omma asja kik olli ärra selletanu. 

Kutsuti ette, Johan Karrask, nink sai küssitus, kes kik ütles nida õige ollewat kui üllewan ülles antu om. 

Otsus  Kohhus moistis, et awwalikkult nätta olli, et olliwa süüdlasse, massawa kumbgi üts rubla hõbbe kahjutassomist Leesmitti Tallo perremeestele, mes 8sa päiwa sissen, Põlgaste kohtomehhe Johan Karrask kätte peap ärra massetu ollema.  Kes sedda rahha sinna tallitap, kos waja om.  Sai kohtomoistminne, ja § 772. n. 773. kohton käijatel ette loetus, nink lätsiwa rahhun wälja. 

                                                           (Allkirri)

Karraskij Kohtomajan sel 15al Juli´l 1877.

                 Kog. kohto Eenistja, Jaan Tullus  XXX

                    "          "    Mannistja, Jakob Uibo  XXX

                    "         "          do      , Jaan Leppason  XXX