Ette tulli Wõrrolt Hindrik Palloots ja kaibas, et Kriiwa Johan Kallas tälle wõlga 6 Rbl. 45 kop. ära ei maswat, mida see (Johan Kallas) temale Kwittungi perra 9. Märzis 1886 aastas ära pidanu masma ja kui nimitedu tärminis ära ei massa, pidanu Johan Kallas temale tema oma lubamise perra ega sõidu ehk käügi eest, mes tema selle wõla takkan otsmise perast peap tegema 3 Rbl. masma nink kuna tema (Palloots) selle nimitedu wõla takkan otsmise perast 4 kõrd kohtu ette om pidanu tulema, sis nõudwat tema reisi raha  a' 3 Rbl. käük 12 Rbl. ja wõlg raha 6 Rbl. 45 kop. Summa 18 Rbl. 45 kop. Johan Kallasse käest kätte saada.

Wastut kaibuse pääle Kriiwa Johan Kallas, et see wõlg õige ollew, ent sellest wõlast ollew tema 4 Rbl. ära masnu arwata 1886 aasta kewajal ja 2 Rbl. 45 kop. nõudmisega ollew Hindrik Palloots kannatada lubanu ja ollew tema seda 2 Rbl. 45 kop. temale (Pallootsale) ära tahtnu massa, ent see ei ollew seda mitte wasta wõtnu, selle man ollew tunnistaja olnu Ado Reimann.

Tõent selle wasta Hindrik Palloots, et Johan Kallas temale kül 4 Rbl. masnu, ent see ollew tõine wõlg olnu ja ei puttunu selle wõla mano; ka ei ollew Johan Kallas mitte temale 2 Rbl. 45 kop. paknu enge ollew küll üttelnu, et temal ennegi 2 Rbl. 45 kop. temale (Pallootsale) massa ollew.

Otsus:

Ado Reimann ette kutsu.

Pääkohtumees: J. Kabist [allkiri]

Kohtumees: P. Sillaots [allkiri]

         "            P. Klais [allkiri]