Neljandalt.  Tulli ette Põlgastest rätsep Johan Häelmo ja kaibas, et temma oppi pois Jaan´i poig, Johan Lodus ei ollewa omma leppitut oppimisse aiga mitte wälja teeninu, ja ollewa üts kuu aiga puudus jätnu.  Nink päälegi 3. rubla selget rahha, ka ütten ärra toonu, kui nimmelt: katz rubla 30 kop. töörahha, nink muidu selget rahha ollewa wõtnu 70. kop. teep ütte kokko wälja kolm rubla, nink pallel kohhut Johan Lodus´t sundi, et omma leppitu aig wälja teenis ja temma rahha ärra massas.

Kutsuti ette Johan Lodus, sai kaibus ette loetus, kes ütles oige ollewat, et kuu aiga ollewa pudus jäänu, ent ütles weel, nemma olnuwa Põlgasten töön, nink Meister ollewa, tedda (Johan Lodus´t) ilma asjanda, ehk süüta wallusaste löönu keppiga, ja ütles minna olle tedda, (Johan Häelmo, ehk Meister´d) liggi kolm aastad ärra teeninu, nink nüüd perra otsa pääl nakkap kaklema, kuis meije wõime lawwa mann wastastikko tööd tetta kui Meister kaklep, minna pea egga silmapilk pelgama, et hoop külge ei tulle.  Sedda wõiwa Põlgaste moona naise kui moona mees, kelle nimmi minna praegu ei woi ülles anda, ent kui kohhus tarwitap neid perrast ülles andma nimme piddi, selle perrast tulli minna ärra.  Nink ütles, rahha ei olle ka ni palju kui Meister ütlep, minno kätte om ennegi 1. rubla 70 kop. töörahha jäänu,  Muud rahha minna ei tija.  Nink ütles weel, meil olli Meistrega leppitu, et enngi minna piddi ammeti tööd oppima, palle kohhut kaeda, siin olle minna ülles tähhendanu, et Meister (Johan Haelmo) minno 58. päiwa põllo ja muidu töö mannu om prukinu, kos minna ammeti töö oppimissest piddi taggasi jääma. 

Sai weel ette kutsutus Meister Johan Häelmo nink kohto poolt küssitus kõiki neide Johan Lodu´est ülles antu punkte perrast, kes selle pääle ütles, eesmalt es salga ka mitte, nink löönu ollewat, ent se ollnu nalja perrast, teiselt, rahha perrast tahtis käänelda, ent es sa ka mitte jäi wijmatte suure teggemissega 185. koppika, nink kolmandalt, päiwa teggemissä es woi ka salgata. 

Otsus  Kohhus moistis (sest, et tunnistuisi tarwis es olle) selle perrast, et om löönu, nink ülle leppingo muijale töömannu prukinu, Johan Lodus, Johan Haelmo mannt oppis prii, et ennamb taggasi mennekit ei olle, sest et päiwi muijale rohkemb om tettu, kui se puduw aig om, ent Johan Lodus, peap 1. rubla 85. kop. 8. päiwa aja seen Johan Haelmol wälja massma, nink omma teine teisest opis prii, ja ei olle kumbkummagile, ennamb middagi nõudmist.

Sai kohtomoistminne ja § 772. nink 773. kohtun käüjatel ette loetus, ent Johan Häelmo, es olle rahhul, et arwas hendal liiga tettu ollewat, nink pallel Protokolli, mes kohhus ka lubbas anda. 

                                                             Eenistja, Jaan Tullus  XXX

                                                            Mannistja, Jakob Uibo  XXX

                                                                  do     ,  Jaan Leppason  XXX