Tulli ette Mõtsawaht Jaan Uibo nink kaibas, et temma om tulnu Rebbaste mõtsast palke andmast, mis sanuwa prugitus Koolimaja Kaiwo Salwete tarwis, ja piddanu kik selle tarwis oppatu Tallu ommal (Mõtsawahhist) nimmetedu ajal ütteliste mõtsan ollema.  Ja nüüd liggi õddangut kui arwassi, et ennamb keddagi ei peas mõtsa tullema, nink teise kik olliwa wälja saadetu, arwata kella pool wie aigast tullime mõllemba Wallawannembaga ütten Mõtsast ärra.  Arwata 2. wersta siin pool mõtsa tulli Pikka Jaan Mark meile tee pääl wasta, omma katte hobbesega ja Sullane rist Saag ja kirwe olliwa Reepääl, mis naitas, et nemma mõtsa minneja olliwa.  Ja Wallawannemb piddas omma hobbese kinni, ja käsk minnol küssida kohhes ta mees ni ilda lähhap, ja weel päälegi katte hobbesega, kunna ütte hobbest selle palgi tarwis jo küll olles olnu, ja nüüd küsse minna Jaan Mark kaest, kohhes sinna ni ilda lähhat, ja saije Jaan Mark käest wastusses, kas sinna kurradi heng ollet selle küssija kohhe minna lähha, nink perrast ütles, et temma lähwat ka palki tooma, nink minna ütli, kes sulle ennamb nüüd õddagu palki and.  Konna kik rahwas, nisamma ka meije olleme mõtsast ärra tulnu, ja saije jälle Jaan Mark käest wastusses, kae minna sinno ei tunneki; minna ni kui perris herra poolt, säetu kige Mõtsa, ja mõtsast andmisse ülle, piddi sis weel temma käest küssima, et kedda sinna sis selle mann tunnet, kae nüüd sis, kässe minna omma herra polt anto Ammeti wõimussen et sinna ei tohhi mitte mõtsa minna.  Selle pääle karras Jaan Mark omma Ree päält mahha, ja wõttis kirwe ka ree päält ütten, nink üttel kas tahhat minnoga rind kokko panda, ja nakkas kiki roppo sõnnadega minno wandma ja minnole wäega liggi tükma nink minna peljassi ja ütli, ärra ni wäega liggi tükki, selle pääle leije Jaan Mark minnole kirwe silmaga rindo, nink pääle löömisse karras omma ree pääle ja sõitse ikkes ülle minno keelu mõtsa ärra.  Selle pääle lätsi minna ja wõtti kats kohtomeest kui nimmelt, Jakob Uibo, ja abbi kohtomees Johan Raig, ja sõitseme ka mõtsa kaema mes temma sääl mõtsan teep. 

ja kui meije kiik, kats kohtomeest, Wallawannemb, ja minna mõtsa saime, olli temmal, nelli kõiwo pakko ärra leigatu, eddimanne 9 tolli, teine 8. tolli, kolmas 7 tolli ja neljas 7 1/2 tolli paksu, ja neide pääl olli palk, ja selle pääle sai nüüd mõtsast wälja tulltus, nink se palk, ja nelli pakku kohtomeeste kässu pääle ka wälja toodus, ja perrast kui meije jobba wäljan ollime tahtse Jaan Mark minnoga ärra leppi, nink pakkus minnole katz rubla, ja üts rubla ütte kokko jodu pääle.

 Nink minna es wõtta, ja es woi ka sedda mitte tetta. Selle kige tunnistaja om Wallawannemb Michel Wõsso, kes allustussest kunni lõppetusseni mann olli; ja nõudis omma Trotsemisse, ja löögi est üts sadda rubla.  Nüüd palles kohhut minno kaibust ülle kullelda ja selletada. 

Sai ette kutsutus Jaan Mark nink üllewanne kaibus ette loetus, kes selle pääle ütles, temma (J.Mark) lännu Kutsari Kaiwo Salwe Palki tooma Sullasega, arwatta pääle Lõuna kella 3me aigu, sis tulnu mõtsawaht Jaan Uibo, Wallawannembaga ajaden temmale wasta, ja temma käändnu hobbese tee päält kõrwale, sis üttelnu Wallawannemb tuu mees saap täämba trahwitus, ja üttelnu Mõtsawahhil, wõtta temma kinni, selle pääle tulli Mõtsawaht J. Uibo,minno mannu arwata 30 sammu taade, ja ütles minnole sinna ei tohhi mitte mõtsa minna.  Selle pääle ütli minna (Jaan Mark) mis sinnol suure tee pääl minnuga teggemist om, sis tulli Mõtsawaht minnole õige mannu, ja tõugas omma rinnaga minnole külge nink üttel, ah, kas sinna tahhat minnoga Noss kokko ajada, selle pääle ütli minna, ärra tükki minnole pääle, minna kuule jo kaugeltke, sinnol josep wiina haisu Suust wälja ni kui Waadist, selle pääle lõije temma minnul rindu, ja minna tõugsi tedda hendast kaugemba, et minna saije ärra paggeda, Selle pääle üttelnu Mõtsawaht (Jaan Uibo) Wallawannemballe lähme perra, ent Wallawannemb Michel Wõsso üttelnu, massa 10 rubla sis lähha, ent Mõtsawaht Jaan Uibol ei olle ni palju rahha ütten olnu, ja üttelnu Wallawannemballe, kui sinna es ussu minno kirjuta sinno ramatuhe, et minna sinnole 10. rubla wõlgo olle, ent Wallawannemb ei ollewat usknu, nink üttelnu massa rahha; selle pääle üttelnu Mõtsawaht Jaan Uibo, et lääme

Jusa´le minna wõtta omma Welle Naise käest rahha wõlgo.  Sis ei olle Wallawannemb ennamb rahha wõtnu, ent üttelnu siin om näggijat.  Sis lännuwa Mõtsa perra, olno jo arwata päiwa minneko aig, kui minna (Jaan Mark) palgiga mõtsast wäljan olli tee pääl, mis aig tookõrd olli, wõiwa tunnista, Johan Raig, Jakob Uibo, Karel Riit, Johan Wähk, MIchel Rattus, ent rahha nõudmisse perrast tunnistaja, Johan Mandli, Michel Wõsso, ja Jakob naine, Mai Uibo. 

1, Kutsuti ette, abbi kohtomees, Johan Raig, sai kohto poolt küssitus mes temma sest asjast tijab üttelda, kes selle pääle ütles, kui meije Mõtsa saime, olli päiw ärra lännu, nink Mark tulli Mõtsast palgiga tee pääle wälja. 

2, Sai kohtomees Jakob Uibo käest kohto poolt küssitus, kes nisamma ütles, kui Johan Raig. 

3, Kutsuti Karel Riit, kes es olle mitte kässu paale tulnu.

4, Kutsuti ette Johan Wähk sai kohto poolt küssitus, mes temma sest asjast tijab üttelda, kes ütles, et päiw olnu ullewan, kui Jaan Mark Mõtsa tulli. 

5, Kutsuti ette Michel Rattus, sai ka kohto poolt küssitus, kes ütles, minna ei woi muud middagi üttelda, et kuuli kui Wallawannemb üttel Mõtsawahhil, too mees olles wäärt trahwi, nink teistkõrd kuuli, kui wallawannemb jälle üttel, wõtta temma kinni, ja kuuli ka kui Mõtsawaht üttel kas nüüd Mõtsa minneki aig om, sest nüüd om jo ilda, ennamb ei olle minna kuuldnu, ei woi ka üttelda. 

6, Sai ette kutsutus rahha tunnistaja Johan Mandli sai nisamma kohto poolt küssitus mes temma tijab üttelda Wallawannemba rahha nõudmisse perrast, kes selle pääle ütles, minna ei toost asjast middagi, ei woi ka kohto küssimisse pääle sukkuki kosta. 

7, Sai ette kutsutus Otsa Michel Wõsso, nink nisamma kohto poolt küssitsus kui Johan Mandli käest, ent kes ütles minna ei tija, ei          olle ka middagi kuulnu ei woi ka kohtul sest asjast middagi kosta. 

8, Sai ette kutsutus Jusa sullane Jaan Kuhhi, nink nisamma küssitus kui üllewangi, kes kohto küssimisse pääle ütles, minna ei tija middagi kohtole kosta. 

9, Ent siski ollewa Jaan Kuhhi, Paakohtomees Jaan Tullusel üttelnu, et temma tennu kambren kapla, kui Wallawannemb Mõtsawahhiga sisse tulnu, wäljan kõnnelnuwa eddimalt too kauba perrast, ja küssinuwa rahha, sis lätsiwa Kambrehe kik, pääle tolle kuuli kui wallawannemb üttel, et ei olle wajaki. 

Otsus   ent es lassewa kohtol Moistagi, nink tulliwa warsti sisse taggasi ja anniwa ülles kohto een, et olliwa ärra leppinu, nink nimmelt sedda wiisi, Jaan Mark Massap, Mõtsawahhil /3/ kolm rubla.  Kedda mõtsawaht ka hendal es perri, enge jaggas arra sõbradele Õlle pääle.  nink lätsiwa rahhun wälja. 

                                                     Eenistja: Jaan Tullus  

                                                     Mannistja: Jakob Uibo  XXX

                                                     Mannistja: Jaan Leppason  XXX