Neljandalt, Tulli ette Jaani´i poig, Abram Perli (Krotussest) ja kaibas, et Hindrik poig, Michel Tõnno, ollewa arwata temmal (9.) üttessa Rubla rahha ärra wõtnu, selle perrast arwa, et temma (M. Tõnno) ütsinda olli kes minno ümbre tallitas, nink minnol pool nakla wiina õkwa silmi sisse wiskas, kos minna woi pool pimmedas olles wõinu jääda, selle perrast, et se assi om Karrasky Mäe Musti kõrtsin sündinu. Sis palle kog. kohhut minno asja ülle kullelda ja selletada, nink minno kaddonu ommandus awwitada kätte saata, tunnistaja omma, kui kohtul peas tarwis ollema, Kõrtsimees Jaan Planken, Kusta Lummi, ja Jaan Kahre, wiimatse mõllemba Krotusest

Sai ette kutsutus Michel Tõnno nink kaibus ette loetus, kes selle pääle ütles, minna olli Krotusse moisan omma tallitusse perrast, nink lätsi koddo minnema, ja tulli Mäe Musti Kõrtsi mannu, nink minnoga ütten olli Jaan Riit, sis lätsime kõrtsi sisse, kos enne meid jo olliwa, kui nimmelt: Peter Sild, Michel Messi, Adam Tõnno, nink Johan Tõnno, jooma pääl. Nink kui meije sisse saime, sis anniwa minnol ka wiina nink Õllut, hendide poolt, nink kässiwa minnol ka osta, mes minna ka teije, enge selle leppingoga, et kui kiik ärra ei sa jodus, mes minna osta, sis walla perra teile kaala, nink sis osti 5e koppiko eest wiina, anni päält Peter Sild´le, Michel Messi´l, nink perra pakkusi Abram Perli´l, temma küll jõije, enge es joo mitte klaasi tühjas, sis ütli minna, kui sinna mitte kiik ärra ei joo, sis wiska selle perra kaala, mes minna ka nalja perrast teije, egga minno heng todda es tija kas Abram´il koppikot olli, woi mitte, sest, et Peter Sild, nink Abram Perli minnol ka Õllut kaala wissasiwa, es panne minna sedda ka mitte lijas, sest, et se kiik nalja assi olli, perran sedda kui minna temmal se weidikenne wiina kaala wissassi, saije temma Abram Perli weel kõrtsimehe käest sakuskit, nink olli opis purjun, nisamma ka olliwa kik ennambast, ennegi Adam ja Johan Tõnno es ollewa mitte purjun, siski olli Abram Perli  hennast wäljan Jaan Riit Ree pääle maggama heidanu, kos sis tükki aja perrast kui targembas olli saanu, jälle kõrtsi tulli, nink leidis sis omma rahha waja, ollewat, nink üttel, minno rahha om ärra kaddunu, kes om leidnu andke kätte.  Sis wõttiwa latternaga tulle, nink lätsiwa kiik rahha otsma, nink keaki es löwwa, temmal wois küll rahha olla, agga ka sedda purju pääga essi wälja ehk mahha kiskuda, Kõrts olli rahwast täis, ent sedda ei woi teeda, kes rahha leidja wois olla, ent minno käen temma rahha ei olle, ehk kui meije kiik weel sääl koon ollime, olles wõinu kiiki ütsikult läbbi otsida, egga minna ütsinda sääl es olle, sääl olli muid rahwast rohkemb. 

Sai ette kutsutus tunnistaja Kõrtsimees Jaan Planken, nink kohto poolt küssitus, mes temma woip Abram Perli rahha kaddomisse perrast üttelda, kes selle pääle ütles, et Michel Tõnno wissanu küll Abram Perli´l pool nakla wiina õkwa wasta silmi, om tõtte, nink rahha olli temmal ka, agga kui paljo ei woi minna tõttest mitte üttelda, ent perrast üttelnu temmale, et ärra kaddunu, agga kes leidja, ehk wõtja, ei woi minna mitte üttelda. 

Sai ette kutsutus teine tunnistaja, Lingi: Kusta Lummi, sai kohtolt nisamma küssitus, kes wiina asja üttel nidasamma ollewat kui Jaan Planken om üttelnu, ent rahha perrast ei tija minna middagi üttelda, kas Abram´il rahha olli, woi mitte, et Michel Tõnno, Abram´iga sisse, ja wälja ütten käisiwa, muud ei tija minna kohtul middagi üttelda. 

Kutsuti ette kolmas tunistaja Jaan Kahre sai nidasamma küssitus, kui üllewanki pool, kes wiina asja üttel nisamma ollewat kui een ülles antu om, ent, et muid keddagi Abram Perli´ga ütten es tallita kui Michel Tonno ütsinda, nink kui se raha om kaddonu, sis om arwata, et rahha wistist Michel Tõnno käen om. 

Otsus  Kohhus moistis Abram Perli poolt ülles antu tunnistajatte wälja ütlemisse perra, et Michel Tõnno om Abram Perli´l wiina silmi wessanu, nink temmaga ütten, sisse ja wälja käinu, sis om arwata, et se kaddonu rahha ka wist Mhl Tõnno käen om, peap Michel Tõnno, se Abram Perli´l kaddonu 9. rubla, nink wiina silma wiskamisse est, Karrasky waeste laati kolm rubla, mes mollemba summa peawa kattessa päiwa aja seen ärra mastu ollema.

 Sai kohto moistminne nink § 772=773, ja 774. kohton kaijatelle ette loetus, ent Michel Tonno es olle sellega rahhul, et arwas hendal liiga tettu ollewat, nin pallel Protokolli, mes kohhus ka lubbas anda.  

(LS) Debr 13! 79.  ausgesendet                             Eenistja: Jaan Tullus  XXX

                                                                                  Manistja: Jaan Leppason  XXX

                                                                            Abbi kohtom. Johan Raig  XXX